НИТХ-ын сонгуульд АН-аас нэр дэвшигчид гишүүд, дэмжигчидтэй хаалттай уулзлаа
НИТХ-ын ээлжит сонгуульд Ардчилсан намаас нэр дэвшигчид өнөөдөр Соёлын төв өргөөнд нийслэлийн есөн дүүргийн төлөөлөл 1800 гаруй гишүүн, дэмжигчтэйгээ хаалттай уулзалт хийлээ.
Нийслэлийн АН энэ удаагийн НИТХ-ын сонгуульд “5+” төлөвлөгөө нэртэй мөрийн хөтөлбөр дэвшүүлэн оролцохоо мэдэгдсэн билээ. Уулзалтын эхэнд НИТХ-ын сонгуульд нэр дэвшигчид “5+” төлөвлөгөөгөө Нийслэлийн шинэчлэлийн багийн ахлагч Э.Бат-Үүлтэй цуг итгэл дүүрэн хэрэгжүүлэхээ илэрхийлж, намынхаа гишүүдийн өмнө мөрийн хөтөлбөртөө гарын үзэг зурж баталгаажуулсан юм.
“5+” төлөвлөгөөг биелүүлэхийн төлөө их хотын эрчимтэй хөгжлийн төлөө нэгэн үзүүрт сэтгэлээр багаа удирдан зүтгэсээр байх болно гэдгээ илэрхийлэн гарын үсгээ анхлан зурсан хүн бол Нийслэлийн шинэчлэлийн багийн ахлагч, Нийслэлийн Засаг дарга бөгөөд Улаанбаатар хотын захирагч, Нийслэлийн АН-ын дарга, Монгол улсын баатар, НИТХ-ын сонгуульд Хан-Уул дүүргийн 36-р тойрогт нэр дэвшигч Эрдэнийн Бат-Үүл. Дараа нь НИТХ-ын дарга, Сүхбаатар дүүргийн АН-ын дарга, Нийслэлийн АН-ын сонгуулийн штабын Ерөнхий менежер, НИТХ-ын сонгуульд Сүхбаатар дүүргийн 25-р тойрогт нэр дэвшигч Дашжамцын Баттулга мөрийн хөтөлбөртөө гарын үзэг зурсан юм. Тэрээр Э.Бат-Үүлийн багийн тулгуур нэгэн багана. Энэ мэтээр бусад нэр дэвшигчид “5+” хөтөлбөртөө гарын үсэг зурав.
Нийслэлийн АН-аас энэ удаагийн НИТХ-ын сонгуульд нэр дэвшигч 45 хүний 90 хувь нь инженер, эдийн засагч мэргэжилтэй. Дундаж нас 45. Нэр дэвшигчдийн 8 нь эмэгтэй байна. Мөн 45 нэр дэвшигчийн 22 нь дахин нэр дэвшиж байгаа юм.
Нийслэлийн АН-ын 45 нэр дэвшигч бол их хотын их ажлын ард гарна гэсэн итгэл дүүрэн баг. Энэ бол Бат-Үүлийн багийн эхлүүлсэн шинэчлэлийн эцсийн үр дүнг үзнэ гэсэн иргэдийнхээ захиасыг биелүүлэх баг. Энэ бол мартагдсан гэр хорооллын маргаашийн хөгжлийг ойртуулах, 5+ төлөвлөгөөг ажил болгох баг.
Энэхүү багийнхаа гарааг сүүгээр мялааж, АН-ын ахмад гишүүн, Нийслэлийн Ардчилсан ахмадын холбооны тэргүүн Д.Хархүү ажилд нь амжилт хүслээ.
Нийслэлийн АН-ын дарга Э.Бат-Үүл “Нийслэлийн АН 2012-2016 онд та бүхний дэмжлэг, иргэдийнхээ итгэл, даалгавраар 5А мөрийн хөтөлбөрөө амжилттай хэрэгжүүллээ. Өнгөрсөн дөрвөн жилд та бид бүтээн байгуулалтын “бослого” гаргаж, хийсэн ажил, шийдсэн асуудал их байсны адил өмнө маань бас хийх ажил, биелүүлэх даалгавар бас л их байна.
Их хотын хотын ажил их, амьдрал баян. Арав, хорин жил өнгөрсөн ч ажилласан болоод орхиод явах бусадтай адил хоноцын сэтгэл бидэнд үгүй. Арав, хорин жилээр хийгээгүй ажил, хураагдсан бэрхшээлээс бид ухарч няцаагүй, ханцуй шамлан зүтгэж, ачаагаа амжилттай нь хамт үүрэх эзний сэтгэлээр ажилласан.
Хотын иргэд ч улс төр нь бага, ажил нь их байгаасай гэж хүсч байна. Улаанбаатар хотоо улам хөгжүүлж, үр хүүхдүүд, хойч үедээ илүү сайхан нийслэлээ өвлүүлцгээе. Бүтээн байгуулалтын “бослогоо” үргэлжлүүлцгээе” гэлээ.
Нийслэлийн шинэчлэлийн багийн 2012-2016 онд хийсэн зарим ажлаас цухас дурдая. Нийслэлдээ тавьсан шинэ зам, шинэчилж өргөтгөсөн зам 259,4 км. Ухрах ёсгүй өчигдөр буюу 2008-2012 оныхтой харьцуулахад 3 дахин урт байна. 2012-2016 оны НИТХ-д АН-ын гишүүн 26 төлөөлөгч ажилласан. Нэг төлөөлөгч 10 км шинэ зам тавьсан гэсэн үг. Ухрах ёсгүй өчигдөр буюу 2008-2012 онд сургууль, цэцэрлэг 37-г барьжээ. Урагшилж эхэлсэн сүүлийн 4 жилд 96 шинэ сургууль, цэцэрлэг барьж босгосон. 26 төлөөлөгчдөө хувааж үзвэл хүн тус бүр 3 сургууль юм уу, цэцэрлэгийн үүдийг нээсэн байна.