Намын анхан шатны байгууллагууд УИХ-ын сонгуульд нэр дэвшигчээ тодруулан дээд байгууллагадаа хүргүүлж байна.
Эрх баригч хүчин АН-ын хувьд нийслэлийн тойргуудад найдвар тавьж, хүч нэмж байгаа. Тиймээс ч АН-ын дарга З.Энхболд Баянгол дүүрэгт нэр дэвшин өрсөлдөхөөр болсон. Түүнтэй хамт энэ тус дүүрэг УИХ-ын гишүүн С.Эрдэнэ, С.Одонтуяа, Баянгол дүүргийн Засаг дарга Д.Оросоо нэр дэвшихээр мандаттаа авчээ. МАН-аас тус дүүрэгт экс Засаг дарга Л.Амгалан нар нэр дэвшихээр яригдаж байгаа.
Хан-Уул дүүрэгт УИХ-ын гишүүн Л.Болд, Г.Батхүү, УИХ-ын даргын Ипотек, барилгын салбар хариуцсан зөвлөх Г.Байгалмаа нар нэр дэвших аж. УИХ-ын гишүүн Л.Болд тус дүүргээс хоёронтоо сонгогдсон бол гишүүн Г.Батхүү анх удаа хотод нэр дэвшиж байгаа юм. Эрх баригчид өнгөрсөн хугацаанд Буянт-Ухаа хорооллоос эхлээд Хан-Уул дүүрэгт бүтээн байгуулалтын ажлыг эрчимтэй өрнүүлсэн. Харин МАН-аас тус дүүрэгт УИХ-ын гишүүн Ц.Нямдорж, Д.Сарангэрэл нар нэр дэвшин өрсөлдөхөөр болсон.
Сүхбаатар дүүрэгт АН-аас УИХ-ын гишүүн Л.Гантөмөр гурав дахь удаагаа сонгогдоод байгаа. Тэрбээр энэ удаад ч тус дүүрэгтээ нэр дэвших юм билээ. Мөн УИХ-ын гишүүн Р.Амаржаргал, Х.Тэмүүжин, ХХБ-ны захирал Б.Мэдрээ нар тус дүүрэгт нэр дэвших сурагтай. МАН-аас Сүхбаатар дүүрэгт УИХ-ын гишүүн Сү.Батболд, УИХ-ын экс гишүүн Ц.Мөнх-Оргил, Сүхбаатар дүүргийн МАН-ын хорооны дарга Д.Цогтбаатар нар нэр дэвших нь тодорхой болсон.
Сонгинохайрхан дүүрэгт АН-аас УИХ-ын гишүүн Л.Эрдэнэчимэг, Ерөнхий сайдын зөвлөх н.Ургамалцэцэг, ШӨХТГ-ын дарга асан О.Магнай нар нэр дэвшихээр тодорчээ. МАН-аас тус дүүрэгт УИХ-ын гишүүн Д.Сумъяабазар, Д.Тэрбишдагва нар дахин нэр дэвшихээр яригдаж байгаа.
Чингэлтэй дүүрэгт АН-аас УИХ-ын гишүүн Г.Баярсайхан, С.Дэмбэрэл, Ш.Түвдэндорж, экс гишүүн Б.Батбаатар нэр дэвших аж. МАН-аас Чингэлтэй дүүргийн Засаг дарга Д.Ганболд, УИХ-ын экс гишүүн Д.Зоригт нэр дэвшихээр болжээ.
Өөртөө зориулж тойрог нэмсэн хэмээн улстөрчдөд адлуулж байгаа УИХ дахь АН-ын бүлгийн дарга Б.Гарамгайбаатар Хэнтий аймгаасаа хоёр дахь удаага нэр дэвших мандатаа авчээ. Түүнтэй хамт Хэнтий аймагт Ерөнхий сайдын зөвлөх М.Хүдэрбаатар, аймгийн Засаг дарга Ж.Оюунбаатар нар нэр дэвших аж.
Ховд аймгийн тухайд АН-аас УИХ-ын гишүүн Д.Батцогт, С.Бямбацогт нар нэг тойрогт буюу УИХ-ын сонгуулийн 35 дугаарт тойрогт өрсөлдөх юм билээ. Базуудын хоорондох өрсөлдөөн ширүүхэн явагдах нь гэж ажиглагчид ярьж байсан.
Сүхбаатар аймагт өмнө нь яригдаж байснаар АН-аас тус аймгийн Засаг дарга Ж.Батсуурь нэр дэвшинэ. Ганц тойрогтой энэ аймагт МАН-аас УИХ-ын гишүүн Ч.Улаан нэр дэвшихээр яригдаж байгаа. Гэхдээ МАХН-д элсэн, эдүгээ сонгууль дөхөхөөр буцан ирсэн түүнийг МАН-ын бага хурлын төлөөлөгчид нэр дэвших эрх олгох нь эргэлзээтэй юм.
Увс аймагт АН-аас УИХ-ын гишүүн Н.Алтанхуяг, ТЭСО компанийн захирал О.Цогтгэрэл нар нэр дэвших юм. Харин МАН-аас УИХ-ын гишүүн Ч.Хүрэлбаатар, Д.Чойжилсүрэн нар тус аймгаас дахин нэр дэвшихээ мэдэгдээд байгаа.
Дархан-Уул аймагт АН-аас УИХ-ын гишүүн М.Сономпил, Р.Бурмаа болон АН-ын гишүүн Б.Мягмардаш нар нэр дэвшихээр болсон байна. Харин Өвөрхангай аймагт АН-аас Л.Бат-Орших, Масс медиа группын захирал Ч.Даваабаяр, АН-ын УИХ дахь ажлын албаны дарга С.Дэмчиг нар нэр дэвших юм.
Орхон аймагт АН-аас аймгийн ИТХ-ын дарга Б.Мягмарсүрэн, Эгийн голын УЦС-ын дарга Д.Одхүү, Зэс эрдэнийн хувь компанийн захирал Д.Алтанхуяг нар нэр дэвшихээр олонхийн санал авсан байна. Тус аймагт УИХ-ын гишүүн М.Батчимэг нэр дэвшихээр яригдаж байсан ч нэрээ татсан байна. Харин МАН-аас тус аймагт УИХ-ын гишүүн О.Содбилэг дахин нэр дэвших юм.
Сэлэнгэ аймгийн АН-ын хорооны 33-р хуралдаанаар УИХ-ын гишүүн ЗГХЭГ-ын дарга С.Баярцогт, УИХ-ын гишүүн, Аж үйлдвэрийн сайд Д.Эрдэнэбат нарыг 100 хувийн саналаар УИХ-ын сонгуульд нэр дэвшүүлэх мандат олгожээ. Монголын үр тариа эрхлэгчдийн газар тариалангийн холбооны тэргүүн Л.Цандэлэгийг 83 хувийн саналаар нэр дэвшүүлэхээр болсон. Энэ аймагт МАН-аас УИХ-ын гишүүн Ж.Эрдэнэбат нэр дэвших нь тодорхай болсон.
Ийнхүү УИХ-ын сонгуульд нэр дэвшигчид намын анхан шатны байгууллагынхаа босгыг давж байна. Одоо эдгээр эрхмүүдийг намын бага хурал, Гүйцэтгэх зөвлөлийн хурлын төлөөлөгчид саналаар нэр дэвших эрхээ баталгаажуулах дараагийн даваа хүлээж байна.
Н.Энхлэн