Монголын Залуучуудын холбооноос улстөрчдийн Хар жагсаалтыг зарлалаа. Жагсаалтын талаар Монголын Залуучуудын холбооны Ерөнхийлөгч А.Мөнхбат мэдээлэл хийлээ.

Залуучуудын байгууллагын V их хурлаар Монгол төрийн босгыг өндөрсгөе, Монголын төрд хулгайч нарыг дахин шургуулахгүй байхын тулд “Хулгайчгүй Монгол” хөдөлгөөнийг өрнүүлэх санаачилгыг гаргажээ.  Энэ дагуу Залуучуудын холбооноос Хар жагсаалтыг гаргах, зарлах дүрэм журмыг тодорхой болгож, өнгөрсөн оны аравдугаар сарын 2-ноос эхлэн олон нийтийн санал асуулгыг эхлүүлсэн юм байна. С.Зориг агсны амь насыг хөнөөсөн өдрийг сонгож, хар жагсаалт, хар үйл явдлыг нэрлүүлж эхэлжээ.

“Хулгайчгүй Монгол” хөдөлгөөн гурван үе шаттайгаар Хар жагсаалтыг гаргажээ. 1992 оноос хойш Үндсэн хуулийн үзэл баримтлалыг зөрчсөн улстөрчдийн үйлдсэн хар үйл явдлуудыг эхний ээлжинд нэрлүүлсэн байна. Үүний дараа нэрлэгдсэн үйл явдлуудыг ангилж, ТОП 100 хар үйл явдлыг гаргасан аж. ТОП 100 хар үйл явдлыг өнгөрсөн дөрөвдүгээр сард Чингисийн талбайд “Гутлын жагсаал” хийхдээ зарласан юм.

Энэ 100 хар үйл явдалд оролцсон болон нэр нь дурдагдсан бүхий л хүнийг сонгуульд нэр дэвшүүлэхгүй байхыг Залуучуудын холбооноос уриалж байсан. Нэр дэвшүүлсэн тохиолдолд Хар жагсаалтад оруулна гэдгээ мэдэгдсэн. Гэвч хар жагсаалтад дурдагдсан бүх хүн сонгуульд нэр дэвшихээр болоод буй юм.

Энэ талаар Монголын Залуучуудын холбооны Ерөнхийлөгч А.Мөнхбат “100 хар үйл явдалд оролцсон этгүүдүүдээ намууд дахин төр түшүүлэхээр нэр дэвшүүлж байгаа нь харамсалтай байна. Тиймээс 100 хар үйл явдалд оролцсон этгээдүүдийг бид Хар жагсаалтад оруулж, УИХ болон орон нутгийн сонгуульд дахин битгий сонгоорой гэдгийг уриалж байна” гэв.

Хар жагсаалтад нэр дэвшигчдийг тойрог бүрээр нь оруулжээ. Тухайлбал Архангай аймагт нэр дэвшиж буй Г.Тэмүүлэн, Д.Ганхуяг, Ё.Баатарбилэг, Н.Батбаяр, Р.Гончигдорж нарын хүмүүс Хар жагсаалтад орсон байна.

Хар жагсаалтын талаар Монголын Залуучуудын холбооны Ерөнхийлөгч А.Мөнхбатаас дараах зүйлийг тодрууллаа.

-Хар жагсаалтад бүх намын төлөөлөл багтсан уу. Эрх баригчдыг оруулахгүй байгаа гэх яриа байсан?

-Бүх намын төлөөлөл бий. Биднийг АН-ынхан эсвэл залуучуудын байгууллагыг удирдаж байсан хүмүүсийг оруулахгүй гэх маш их хардлага байсан. Хар жагсаалтыг гаргах ажиллагаа эхнээсээ эхлээд өнөөдрийг хүртэл үнэний төлөө явсан.

-Жагсаалтыг хэрхэн гаргасан вэ? Энэ үнэхээр шударга жагсаалт болж чадсан уу?

-Бидэнд ард иргэдээс авсан маш олон саналыг баримт хадгалагдаж байгаа. 1992 оноос хойш Монголын төрийн үйлдсэн бүхий л болчимгүй, хариуцлагагүй үйл явдлууд энд орсон. 100 хар үйл явдал иргэдээс нэрлэгдэж гарсан. 100 хар үйл явдлын эзэд бол баримтаар бэлэн байгаа.

-Энэ жагсаалт сонгуулийн хуулийг зөрчих үү?

Хэрэв сонгуулийн хуулийг зөрчиж байгаа гэж үзвэл тухайн этгээд нь шүүхэд хандаж болно. Монголын Залуучуудын холбоо шүүхэд хариуцагч болоход бэлэн байна.

-Цагаан жагсаалтыг хэзээ зарлах вэ?

Цагаан жагсаалтыг зургаадугаар сарын 11-нд албан ёсоор зарлана.

Хар жагсаалтын талаарх дэлгэрэнгүй мэдээллийг энд дарж үзнэ үү.

В.Бат