"Panama Papers"-ээс дэлхийн улс орнуудын оффшор данстай хүмүүсийн нэрийг өнгөрсөн тавдугаар сарын 9-нд олон нийтэд ил болгосон. Энд Монгол Улсын 28 иргэний 49 данс байсан юм. Тэр дундаа Ерөнхий сайд асан Сү.Батболд, Барилга хот байгуулалтын сайд асан Д.Цогтбаатар, “Петровис” ХХК-ийн ерөнхий захирал Ж.Оюунгэрэл нар оффшор компанид хувьцаа эзэмшдэг нь олон нийтэд ил болсон.

Мэдээлэл цацагдаад маргааш өглөө нь л УИХ-ын гишүүн Сү.Батболд, Барилга хот байгуулалтын сайд асан Д.Цогтбаатар бидэнд ямар ч оффшор данс байхгүй, худал гүтгэлэг хэмээн яаран сандран мэдээлэл хийсэн билээ.

Уг нь "Panama Papers"-ээс гаргасан мэдээл олон нийтэд ил болонгуут зарим улс орны төрийн өндөр албан тушаалтнууд ажлаа өгсөн. Гэтэл Сү.Батболд, Барилга хот байгуулалтын сайд асан Д.Цогтбаатар нарыг гүтгэсэн болоод л үлдсэн. Хөгжилтэй улсын жудагтай улстөрчид оффшор данстай гэсэн нь батлагдаагүй ч ийм мэдээлэл гарангуут албан тушаалаасаа огцорч, ард түмнээсээ уучлал гуйж байхад манай улстөрчид тэр дор нь мэдээлэл хийж намайг гүтгэж байна хэмээн гэмгүй царай гаргаж байна.

Хэрвээ үнэхээр л оффшор дансгүй байсан бол хууль хяналтын байгууллагаар шалгуулаад, шалгалтын үр дүнг олон нийтэд танилцуулсан бол арай жудагтай харагдах байлаа. Зарим хүмүүс оффшор данстай байх нь нүгэл биш, байдаг л зүйл хэмээн тайлбарлаж байгаа.

Үнэндээ оффшор данс гэдэг нь Татвараас зайлсхийж, харилцагчийнхаа их хэмжээний мөнгийг хадгалахын тулд банкуудын үзүүлдэг үйлчилгээг оффшор гэдэг. Мөн оффшор бүсэд байршуулж байгаа мөнгөний эх үүсвэрийг тодорхойлохыг шаардахгүйгээр байршуулдаг байна.

Эрх мэдэлтнүүд хууль бус санхүүгийн гүйлгээ хийх, бохир мөнгөө нуухын тулд оффшор бүсэд данс нээлгэдэг” гэдэг.

Б. Нарангэрэл