Бусдад үйлчилсэн шийдвэрийг хүчингүй болгохыг даалгав
2016-06-11

Авлигатай тэмцэх газраас Ерөнхий төлөвлөгөөний газрын дарга бөгөөд Улаанбаатар хотын ерөнхий архитектор О.Одбаярт албан бичиг хүргүүллээ.

 

Нийслэлийн Сүхбаатар дүүргийн 6 дугаар хорооны оршин суугчаас Авлигатай тэмцэх газарт ирүүлсэн гомдлын мөрөөр хяналт шалгалтын ажил явуулав. Шалгалтаар Нийслэлийн ерөнхий төлөвлөгөөний газар, Газар барилгажилтын зөвлөл нь үүсээд байсан нөхцөл байдлуудыг буюу өмнөх 3 удаагийн хурлаар дэмжигдээгүй шалтгааныг арилгасан эсэхийг бүрэн гүйцэд шалгаж тогтоолгүйгээр “ДМК” ЗГБХН*-д барилга барих зөвшөөрлийг олгож “дэмжсэн” шийдвэр гаргасан нь бусдад давуу байдал олгосон, Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 3 дугаар зүйлийн 3.1.11-д заасан олон нийтийн зүгээс ашиг сонирхлын зөрчилтэй гэж ойлгогдохуйц нөхцөл байдал бий болгосныг тогтоов.

 

Иймд Авлигын эсрэг хуулийн 18 дугаар зүйлийн 18.4.2-т заасныг үндэслэн “ДМК” ЗГБХН-д давуу байдал бий болгосон, олон нийтийн зүгээс ашиг сонирхлын зөрчилтэй гэж ойлгогдохуйц нөхцөл байдлыг үүсгэсэн Газар барилгажилтын зөвлөлийн 2016 оны 3 дугаар сарын 17-ны өдрийн шийдвэрийг хүчингүй болгож өмнөх хурлуудаар хэлэлцэх үед дурдагдсан зөрчлүүдийг арилгасан гэх нөхцөл байдлыг бүрэн гүйцэд тогтоосны эцэст дахин шийдвэр гаргах замаар асуудлыг шийдвэрлэх нь зүйтэй хэмээн Авлигатай тэмцэх газар үзэж байна.

Shuud.mn
Сонин хачин