УИХ-ын 2016 оны сонгуулийн сурталчилгаа өнөөдрөөс албан ёсоор эхэлж байна. Энэ удаагийн сонгуульд 12 нам, 3 эвслийн 429 нэр дэвшигч, 69 бие даагч, нийт 498 хүн өрсөлдөнө. Нэр дэвшигчдийн 215 нь аймаг орон нутагт, 283 нь нийслэлийн тойрогт өрсөлдөх юм. Дээрх нэр дэвшигчдийн 129 нь эмэгтэй хэмээн СЕХ-ноос мэдэгдэв. Улс төрийн намуудаас АН, МАН тойрог бүрт нэг буюу 76 хүн, МАХН 71, Тусгаар тогтнол, эв нэгдлийн эвсэл 44, Бүгд найрамдах нам 36, Иргэний хөдөлгөөний нам 27, Социал Демократ нам 17, ИЗНН 15, Эрх чөлөөг хэрэгжүүлэгч болоод Хаан сонголт эвсэл тус бүр есөн нэр дэвшигчийг тус бүр дэвшүүлж буй юм.
Ардчилсан намын нэр дэвшигчид энэ удаад ард түмэнтэйгээ сонгуулийн сурталчилгааны нээлтээ хийж байгаа аж. Тодруулбал, тэд нэгдсэн зохион байгуулалтад орж, нүсэр шоу арга хэмжээ хийхийг зорьсонгүй. Харин 76 нэр дэвшигч тойрог бүртээ иргэдтэйгээ уулзаж сурталчилгааны нээлтээ хийсэн байна.
МАН-ын хувьд нийт нэр дэвшигч гишүүд нь Тусгаар тогтнолын Их танхимд цуглаж морин цагт нээлтээ хийжээ. Голдуу залуучууддаа итгэл хүлээлгэсэн ууган намын сонгуулийн нээлт тун сүртэй болжээ. Харин МАХН-ын Сонгуулийн сурталчилгааны нээлтийн арга хэмжээ Crocus Event Hall-д болж байгаа юм байна.
Б.Саран
Эх сурвалж: АН-ын сонгуулийн төв штаб