Сонгуулийн сурталчилгааны энэ өдрүүдэд иргэд тойрог тойрогтоо аль нам, эвслээс хэн хэн, УИХ болоод орон нутгийн сонгуульд өрсөлдөж байгааг тандаж, таних гэж хөөрөлдсөөр. Шинэ долоо хоногийг сонгуулийн сурталчилгааны зэрэгцээ хувьцаагаа төрд худалдахаар банкинд дугаарлаж эхлүүллээ. Сонгуулийн шоу хэдий ч Засгаас худалдаж авна гэсэн дээр нь хувьцааны өгчихье гэх иргэд байхад 300 мянга төгрөг байсан, байгаагүй ч амьдарна. Хувьцаанаасаа зарж үрэхгүй байж л байг гэх хэсэг ч байна. Ер нь хувьцаа худалдаж авах нэрийдлээр эрх баригчид сонгогчдод мөнгө тараалаа гэж шүүмжлэх хэсэг ч байна.
Монголын улс төрийн хоёр том хүчин АН, МАН-ын сонгуулийн урианаас гадна мөрийн хөтөлбөрийг сонгогчид сонжиж байна лээ. Сонгуулийн хуулиар иргэдэд эд зүйл, мөнгө амлах хориотой. Тиймээс ч тэртээ 2008 оных шиг иргэн бүртээ хувь хишиг хүртээнэ гэж амлах улс төрч байтугай улс төрийн хүчин байхгүй.
Намуудын мөрийн хөтөлбөрөөс ирэх жилүүдэд эдийн засагг нийгмийн чиглэлд ямар бодлого хэрэгжүүлэх талаар сонирхлоо. АН-ын тухайд ирэх жилүүдэд их бүтээн байгуулалтаа үргэлжлүүлнэ гэдгээ уриалж байгаа. Тэд амжилтдаа тулгуурлан ирээдүйг цогцлоохоо амлаж байна.
Ардчилсан нам 2016-2020 онд эдийн засаг, нийгмийн бүхий л салбарт хэрэгжүүлэх бодлогоо сонгуулийн мөрийн хөтөлбөртөө тодорхой тусгажээ. Засгийн газрын одоогийн бүтцийн дагуу 15 яамны салбар тус бүрээр хэрэгжүүлэх бодлогоо тодорхойлсон байна . Мөрийн хөтөлбөрийн гол үзэл санаа бол өнгөрсөн 4 жилд тавьсан аж үйлдвэржилтийн суурийг улам бэхжүүлж, монгол бүтээгдэхүүнийг дэлхийн зах зээл дээр эрчимтэй экспортлон, нийт ажил эрхлэгчдийн орлогыг нэмэгдүүлэх замаар эдийн засгийн хөгжлийг хурдасгахаа онцолсон байна. Өнөөгийн Монгол орны өмнө тулгарч буй бүхий л хүрээний асуудлыг шийдвэрлэхийн тулд эдийн засгийн хөгжлийг хурдасгах бодлогыг барьжээ. Эдийн засгийн өсөлтийг хурдасгах зорилтоо экспортын чиг баримжаатай аж үйлдвэрийг хөгжүүлэх бодлогоор хэрэгжүүлэх аж. Энэ хүрээнд үйлдвэржилтийг хот хөдөөгүй, орон даяар эрчимтэй өрнүүлэх юм байна. Экспортыг эн тэргүүнд тавьсанаар дор монгол хүний бүтээмжийг нэмэгдүүлж, баялаг бүтээгчдээ дэмжих юм байна. Энэхүү бодлогоороо хөдөлмөрийн зах зээлийг хүчтэй тэлж, дунд хугацаанд нийт ажил эрхлэгчдийн орлогыг хоёр дахин өсгөх эрхэм зорилтыг дэвшүүлжээ. “Монгол Улс уул уурхайн хэт хамаарлаас ангижирч, аж үйлдвэр, ХАА-н бүтээгдэхүүнээрээ дэлхийн дэвжээнд өрсөлдөх ёстой. Энэ зорилтоо хэрэгжүүлэхийн тулд дэлхийн эдийн засаг, ялангуяа хөрш орнуудын зах зээлтэй нягт интеграцид орох бодлогыг идэвхтэй авч явуулна. Энэхүү түүхэн зорилтоос ухарч, няцах эрх бидэнд байхгүй. 2012 оны сонгуулиар Ардчилсан Намыг УИХ-д олон гишүүнтэй болгосон сонгогчдынxoo итгэлийг дааж, бид Монголын аж үйлдвэр, дэд бүтцийн суурийг тавьж, бүтээн байгуулалтыг эрчимтэй өрнүүлж, экспортын хэмжээг хурдтай нэмэгдүүлж ирлээ. Харин, энэ 2016 оны сонгуулиар биднийг олонхи болгож өгвөл Монгол Улс илүү ихийг бүтээж, Монгол хүн бүрийн, монгол айл бүрийн орлого хурдтай өснө” гэж АН мөрийн хөтөлбөртөө тусгасан байна.
Харин МАН-ын хувьд парламентад олонхи болвол эдийн засгийн хямралыг даван туулах мэргэжлийн Засгийн газар байгуулах мөрийн хөтөлбөртөө онцолсон байна. Богино хугацаанд эдийн засгийг сэргээн тогтворжуулах хөтөлбөр боловсруулж, улсын төсөвт тулгарсан өрийн дарамтыг үе шаттай бууруулж, хөрөнгө оруулалт, бизнес эрхлэлтийг тогтвортой өсөлтийг бий болгох зорилт дэвшүүлсэн байна. Импортлогчоос экспортлогч орон болгож, татвар нэмэхгүй, малчны зээлийн хүүг бууруулахаар хөтөлбөртөө тусгажээ. МАН-ын мөрийн хөтөлбөрт төрүүлж өсгөсөн хүүхдийн тоогоор эхийн ажилласан жилийг 1.5 жилээр тооцох, 18 нас хүртэлх 4-өөс дээш хүүхэдтэй гэр бүлийг эхний оронсууцжуулах, цалин тэтгэврийг үе шаттайгаар нэмэгдүүлэх зэрэг нийгмийн чиглэлд хэрэгжүүлэх бодлогоо тусгажээ.
Энэчлэн намуудын мөрийн хөтөлбөрөөс түүвэрлэхэд өнөөдрийн хямралыг умартаж, ирэх жилүүдэд ирээдүйдээ итгэх хонгилын үзүүрт гэрэл тусахаар л харагдана.
Юутай ч сонгуулийн сурталчилгааны өдрүүд ч сайхан үргэлжилж байна.
Н.Энхлэн