Францын Лилле хотноо “Евро 2016” хөлбөмбөгийн аварга шалгаруулах тэмцээн зохион байгуулагдаж байна. Тэгвэл өчигдөр Англи болон Оросын хөлбөмбөгийн фанатууд дахин зодолдож, эмх замбараагүй байдал үүсгэсэн талаар “www.dailymail.co.uk” мэдээллээ.

Цагдаагийнхан шуурхай ажиллаж, фанатуудыг хүчээр тараажээ. Мөн уг үймээнийг санаатайгаар бий болгосон гэх хэргээр ОХУ-ын хоёр иргэнийг баривчилсан болохоо Цагдаагийн төв сайтад нийтэлсэн байна.

Хэвлэлүүд “Английн фанатууд кофегоор үйлчлүүлэх үед Оросын фанатууд гэнэт дайрсан. Фанатууд нэг нэгэн рүүгээ сандал, ширээ шидсэн” гэсэн мэдээлжээ. “Оросын фанатууд зодооныг эхлүүлсэн” хэмээн Английн фанат “AFP” агентлагт ярьсан байна.

Марсель хотноо энэ сарын 12-ны өдөр хоёр улсын хөлбөмбөгийн шигшээ багийнхан тоглох үеэр фанатууд зодолж, эмх замбараагүй байдал үүсгэн билээ. Зодоонд 300 гаруй хүн оролцжээ.

Европын хөлбөмбөгийн холбоо хоёр улсын фанатууд дахин үймээн дэгдээвэл Англи болон ОХУ-ын шигшээ багийн тэмцээнээс хасна хэмээн сануулсан юм.

Б.Дэлгэрцэцэг