Сонгуулийн хуулийн дагуу сонгогчдын шилжилт хөдөлгөөн зогсоод байна. Хуулийн хугацаанаас урьдаж нэр дэвшигчид өөрийн сонгогчдоо шилжүүлж авчээ. Өнгөрсөн сонгуулиар томоохон групп, компаниуд ажилчдаа амраах нэрийдлээр сонгогчийн үнэмлэхийг нь шилжүүлж, чамгүй олон санал татсан сураг бий. Энэ сонгуулиар ч энэ тактик давтагдсан байж магадгүй байна.
Нийгмийн сүлжээнд Хөвсгөл, Баянхонгор аймагт шилжин очсон сонгогчдын тоог дурдсан албан бичиг түгж байна. Хөвсгөл аймагт гэхэд нийт 3145 сонгогч шилжин очжээ. Тэдний 720 орчим нь 37 дугаар тойрогт шилжин очжээ. Харин 38 дугаар тойрогт 43, 39 дүгээр тойрогт 2400 орчим сонгогч шилжин очсон байна. Хамгийн олон хүн очсон 39 дүгээр тойрогт МАН-аас Л.Энх-Амгалан, АН-аас Б.Эрдэнэбат нар нэр дэвшиж буй. Тэгвэл 37 дугаар тойрогт МАН-аас Л.Мөнхбаатар, АН-аас П.Цагаан нарын хүмүүс өрсөлдөж байна. Харин Хөвсгөлийн 38 дугаар тойрогт МАН-аас Ц.Даваасүрэн, АН-аас Ц.Оюунгэрэл зэрэг нэр дэвшигчид бий.
Тэгвэл Баянхонгор аймгийн тойргуудад 2268 сонгогч шилжин очжээ. Тэдний хамгийн олон нь буюу 1913 нь 9 дүгээр тойрогт санал өгөхөөр очсон байна. Харин тус тойрогт МАН-аас Л.Элдэв-Очир, АН-аас Х.Баттулга нар нэр дэвшиж буй. 257 сонгогч шилжин очсон 7 дугаар тойрогт МАН-аас Г.Занданшатар, АН-аас Д.Ганбат нар өрсөлдөж буй бол олимпийн аваргын нэр дэвшиж буй 8 дугаар тойрогт 98 хүн санал өгөхөөр саналаа хуудсаа шилжүүлсэн байна.
Энэ баримтаас гадна хотын нэг тойргийн хэсгийн хороодын шилжилт хөдөлгөөнийг сонирхлоо. Сонгинохайрхан дүүрэг буюу УИХ-ын 73 дугаар тойргийн 3, 4, 5 дугаар хэсгийн хорооноос нийт 100 хүн хөдөө орон нутаг руу сонгогчийн үнэмлэхээ шилжүүлсэн байна. Тэднээс хамгийн олон нь буюу 28 нь Увс аймаг руу шилжсэн бол Баянхонгор руу 17, Хөвсгөл рүү 15, Өвөрхангай руу 13 сонгогч явжээ. Харин тус гурван хэсгийн хороонд нийт 7 хүн шилжин ирсэн байна.
Эндээс харвал нийслэлийн сонгогчид орон нутгийг зорих нь ихэсчээ. Арван хоног үргэлжилсэн шилжилтийн хугацаанд багтаж, сонголтоо өөрчилсөн хүмүүсийн зарим нэг бөөгнөрөл хардлага төрүүлж, нийгмийн сүлжээ хэрэглэгчид "эзнийг дагасан их нүүдэл"-ийн талаар ч олон таамгыг дэвшүүлж байна.
В.Хэрлэн
Уншиж байна |