Монгол Улсын Ерөнхий сайд Ч.Сайханбилэг цаг үеийн асуудлаар мэдээлэл хийлээ. Тэрбээр:
-Өнөөдөр Монгол Улсын Ерөнхий сайдын хувьд цаг үеийн мэдээллийн хувьд сайн мэдээ дуулгах гэсэн. Өнөөдөр хоёр эмнэлгийн суурь тавигдаад явж байна. Хоёр том цахилгаан станцыг барих гэрээнд гарын үсэг зурж байна. Монголчуудын дуулах сайн мэдээг зарим улс төрийн хүчин саар мэдээ болгох гээд байна. Эрдэнэт үйлдвэр 100 хувь Монголын мэдэлд шилжилж байгаа.
Энэ асуудлыг сонгуулиас ангид байлгах гэж Засгийн газар хичээн ирлээ. Улс төрийн эрх ашгаас илүүтэй улс орны эрх ашиг байдаг. Эрдэнэт үйлдвэрийг Монгол Улс 51 хувийг “Ростек” компани 49 хувийг эзэмшдэг байсан. Одоо Эрдэнэт үйлдвэрийн 49 хувийг Худалдаа хөгжлийн банк, “Монголын зэс” компани авч, Эрдэнэт УБҮ зуун хувь үндэсний компани боллоо. Эрдэнэт өмнө нь хуулиас дээгүүр, хамтарсан үйлдвэр байсан бол одоо Монгол Улсын үндэсний аж ахуйн нэгж болж хувирна. Өнөөдөр “Эрдэнэт” үйлдвэрийн ногдол ашиг 100 хувь Монголдоо орно.
“Эрдэнэт” үйлдвэрийг дагасан барилга байгууламж Монголдоо ирнэ. “Монросцветмент” мөн 100 хувь Монгол Улсын аж ахуйн нэгж болно. “Эрдэнэт” үйлдвэрийн үйл ажиллагаа хэвийн явагдаж байгаа. Ямар нэг данс хаасан зүйл байхгүй. Энэ асуудлыг Оросын талын хамгийн өндөр түвшинд шийдвэрлэсэн болно.
Монголын Засгийн газар аль нэг гуравдагч этгээдэд хувиа зарахгүй. Үндэсний аж ахуйн нэгжээ 100 хувь авч явна. Хэн нэг гуравдагч этгүүд үүнд оролцохыг хориглосон. Хэрвээ Монгол Улсын компани өөрийн хувиа зарах тохиолдолд зөвхөн Монгол Улсын Засгийн газарт зарна.
Их өрийн асуудлыг бид эцэслэн шийдвэрлэж чадсан. Хамгийн сүүлийн өрийн үлдэгдлийг манай Засгийн газар төлж тэглэсэн.
Монголчууд гадаад бодлого, улс үндэстний эрх ашгаараа нэг байх ёстой. Сонгуулийн маргааш амьдрал, эдийн засаг үргэлжилнэ.
Иргэдээ сонгуульдаа идэвхтэй оролцоорой хэмээлээ.
Н.Энх