УИХ-ын сонгуулийн Дорнод аймгийн 14 дүгээр тойрогт МАН-ын Х.Болорчулуун, АН-ын М.Зоригт нар өрсөлдсөн. Энэ өрсөлдөөнд МАН-ын Х.Болорчулуун ялж, парламентын танхимд дахин суух эрхээ авсан юм. Харин энэ эрхээ шударгаар аваагүй хэмээн өрсөлдөгч М.Зоригт хуулийн байгууллагад гомдол гаргажээ. Санал хураах өдөр сонгогчдыг машин машинаар нь зөөсөн тухай нэр дэвшигч Х.Болорчулуун, түүний менежер, жолооч нарын хооронд өрнөсөн ярианы бичлэгийг үндэслэн гомдол гаргаад буй аж. М.Зоригтын зүгээс Х.Болорчулууныг Сонгуулийн тухай хуулийн 70 дугаар зүйлийг зөрчсөн хэмээн үзжээ.
Хуулийн байгууллагад гаргасан гомдолд “Улсын Их Хурлын сонгуулийн 14 дүгээр тойрогт нэр дэвшиж буй өрсөлдөгч нам, нэр дэвшигчдийн зүгээс иргэдийг урьдчилан зохион байгуулж микро автомашинаар үнэ төлбөргүй сумд руу зөөвөрлөн улмаар өөрийн намын нэр дэвшигчид саналаа өгвөл бэлэн мөнгөөр урамшуулах зэрэг Сонгуулийн тухай хуулийн 70 дугаар зүйлийн 70.1.1, 70.1.3 дахь заалтуудыг ноцтой зөрчсөн хууль бус үйлдлүүдийг гаргаж байна. Тухайлбал, улсын дугаар нь тодорхойгүй цагаан, ногоон өнгөтэй Истана маркийн арав гаруй микро-автобус зарим сумд руу хүн тээвэрлэн дээрх хууль бус үйл ажиллагаанд оролцож байна” хэмээн дурдаж, шалгаж өгөхийг хүсчээ.