НИТХ-ын анхдугаар хуралдааны хэлэлцэх асуудлын дарааллын дагуу НИТХ-ын даргыг сонгох тухай хэлэлцэв.

НИТХ-ын төлөөлөгч Д.Амарбаясгалан НИТХ-ын даргад нийслэлийн МАН-ын дарга Ц.Сандуйг нэр дэвшүүлсэн тогтоолыг танилцуулав. МАН болон нийслэлийн МАН-ын тэргүүлэгчдийн хуралдаанаас Ц.Сандуйг НИТХ-ын даргад нэр дэвшүүлэв.

Нэр дэвшигчээс төлөөлөгчид асуулт асуув.

Төлөөлөгч Ц.Баатархүү:

Өнгөрсөн дөрвөн жилийн хугацаанд НИТХ байнгын ажиллагаатай болсон. Хуралдааны үйл ажиллагаа нийслэлийн иргэдийн өмнө нээлттэй болсон. Та НИТХ-ын хуралдааныг хэрхэн зохион байгуулах вэ? Сонгуулийн үеэр гарсан 60 тэрбумын бичлэг дээр ямар байр суурьтай байна вэ? Албан ёсны тайлбараа НИТХ-ын хуралдаан дээр хэлнэ үү? Газрыг харилцааг хэрхэн зохион байгуулж, ямар менежментээр удирдах вэ?

Ц.Сандуй: Бид ирэх дөрвөн жил нийслэлийнчүүдийн төлөө ихийг хийхийг зорьж орж ирсэн. НИТХ байнгын ажиллагаатай болж, сард нэг удаа хуралдаж, нийслэлчүүдийн асуудлыг шийддэг байсан. Ирэх дөрвөн жилд НИТХ ил тод, нээлттэй, нийслэлчүүдийн санаа бодлыг тусгасан хурал байх болно. Хэрвээ та бүхэн итгэл үзүүлж сонговол нийслэлчүүдийн төлөө хоёргүй сэтгэлээр ажиллана.

Энэ бол сонгуулийн үеэр гарсан гүтгэлэг, эвлүүлэг. Удахгүй цагдаагийн байгууллагаар эвлүүлгийг хийсэн эзэн тодорхой болно.

Нийслэлийн газрын албанд би төрийн албан хаагч байсан. Ажиллаж байх хугацаандаа төрийн албаны хууль дүрмийг биелүүлж үйл ажиллагаагаа явуулж байсан. Нийслэлийн газар зохион байгуулалтын ажлыг шинэ түвшинд гаргана.

Төлөөлөгч Ц.Одонтунгалаг: Иргэдийн асуултаа асууя. Сонгуулийн дараа олгоно гэж ярьсан газрын гэрчилгээг хэзээ олгох гэсэн асуултыг Сонгинохайрхан дүүргийн иргэн асууж байна. Мөн 60 тэрбумын асуудлыг хуулийн байгууллага тогтоовол хариуцлага хүлээх үү?

Ц.Сандуй: Газар олгох амлалтыг хэн ч өгөөгүй. 60 тэрбумын асуудлыг хуулийн байгууллагаас тогтоовол би хариуцлага хүлээхэд бэлэн.

Төлөөлөгч Л.Нарантуяа: Бид өмнөх 4 жил бүтээн байгуулалтын хувьсгалыг хйисэн. Газрын асуудла хүнд байсан. Газрыг замбараагүй олгосон байсан. Бид газар чөлөөлөхөд асар их зардал гаргасан. Цаашид энэ хотын замбараагүй төлөвлөлт, газар олголт дээр ямар бодлого гэж байна вэ?

Ц.Сандуй: Өнгөрсөн 4 жид байгаагүй их хөрөнгөөр бүтээн байгуулалтын ажил хийсэн. Бид бүтээн байгуулалтын ажлыг үргэлжлүүлнэ. Гэхдээ алдаа завхрал, гарсан хөрөнгө мөнгө шамшигдуулсан асуудалд хуулийн дагуу хариуцлага тооцно.

2003 оноос газрын хууль гарсантай холбогдуулан хөдөө орон нутгаас шилжин ирэгсэд маш их байсан. Өдөрт 20-25 хашаа Улаанбаатарт зөвшөөрөлгүй баригддаг байсан. Хотын захиргааны байгууллагад энэ шилжилтийг зогсоох боломж байгаагүй. Үүнийг тухайн жилийн газар зохион байгуулалтад оруулж, тодотгол хийх замаар шийддэг байсан. Өмнө олгосон газрууд ямар ч хууль зөрчөөгүй.

В.Бат