Сонгуулиар ялалт байгуулна гэдэгтээ бат итгэж, өөрийгөө нийслэлийн Засаг даргаар дахин томилоод байсан Э.Бат-Үүлийн гомдол өнөөдрийг хүртэл тайлагдаагүй бололтой. Тэрбээр НИТХ-ын анхдугаар хуралдааныг даргалсан бөгөөд индрийг далимдуулж, үнэмлэхүй ялалт байгуулсан МАН-ынханд хандан хатуухан үг хэлэв. Тэрбээр МАН-ынхныг даруухан байхыг сануулав.
Э.Бат-Үүл “Та нар үнэмлэхүй ялалт байгуулсан. Та нар хөөрөөд юу болсныг ойлгоогүй. Би өнөөдрийг хүртэл нийгмийн хамгийн түвэгтэй амьдрал болох улс төрд явсаар ирсэн. Энэ улс орон аюулын ирмэг рүү, хагарал сүйрэлд хүрэх гэж байхад аварсан. Энэ туршлагаар та нарын хэн нь ч надтай эн зэрэгцэхгүй. Энэ улс төр эвгүйдвэл юу болдгийг би сайн мэднэ.
Биднийг ялагдсанд харамссан харуусал олон нийтийн дунд их байгаа. Нийгмийн эсэргүүцлийн цуглааныг зохион байгулах туршлага, нэр нөлөөтэй хүмүүс гудамжинд гарсан. Үүнийг битгий мартаарай. Та нарын овлигогүй зан эсэргүүцлийг улам өдөөнө” хэмээн томоохон сануулгыг өглөө.
В.Бат