НИТХ-ын анхдугаар хуралдаан үргэлжилж байна. Хуралдаанаар НИТХ-ын 2016 оны сонгуулийн үр дүнг хэлэлцэж, төлөөлөгчдийг батламжлав. Мөн НИТХ-ын даргаар нийслэлийн МАН-ын дарга Ц.Сандуйг сонгов.
Хуралдааны завсарлагааны дараа төлөөлөгчдөд үнэмлэх, энгэрийн тэмдэг гардууллаа. Мөн НИТХ дахь намын бүлгүүдийн шийдвэрийг төлөөлөгчдөд танилцуулсан юм. НИТХ дахь МАН-ын бүлэг 34, АН-ын бүлэг 11 төлөөлөгчөөс бүрдэж байна.
Үргэлжүүлэн НИТХ-ын Тэргүүлэгчдийн тоог тогтоож, батлах асуудлыг хэлэлцэв. МАН-ын бүлгээс Тэргүүлэгчид 11 хүний бүрэлдэхүүнтэй байх саналыг гаргав. Төлөөлөгчдийн олонх нь уг саналыг дэмжсэнээр НИТХ-ын Тэргүүлэгчид 11 хүний бүрэлдэхүүнтэйгээр байгуулагдав.
МАН-ын бүлгийн дарга Д.Амарбаясгалан “МАН-ын бүлэг шийдвэр гаргасан. Тэргүүлэгчдийн тоог 11-ээр тогтоосон. МАН цөөнхөө хүндэтгэж, тэргүүлэгчдийн бүрэлдэхүүнд хоёр хүнийг багтаах санал гаргалаа” гэв. Харин АН-ын бүлгийн дарга Ц.Баатархүү АН-ын бүлгээс Тэргүүлэгчдийн бүрэлдэхүүнд гурван суудал авах саналыг гаргасан ч дэмжигдсэнгүй. Уг саналаас үүдэн АН-ын бүлгийн дарга Ц.Баатархүү “олонх цөөнхийг буланд шахаж, хэт олонхоор шийдвэр гаргаж байна. Тиймээс АН-ын бүлгээс Тэргүүлэгчдийн бүрэлдэхүүнд нэр дэвшүүлэхээс татгалзаж байна” гэв.
МАН-ын бүлгээс НИТХ-ын Тэргүүлэгчид
Ц.Сандуй
Ж.Батбаясгалан
Н.Баярмөнх
Э.Бат-Амгалан
Д.Баярсайхан
Ж.Алдаржавхлан
М.Эрдэнэтуяа
П.Баярхүү
Ж.Батсайхан нарын нэрийг дэвшүүлж, санал хураалт явуулав. Төлөөлөгчдийн олонх нь дэмжиж, НИТХ-ын Тэргүүлэгчид есөн хүний бүрэлдэхүүнтэй батлагдлаа.
В.Бат
Уншиж байна |