НИТХ-ын анхдугаар хуралдаанаар Нийслэлийн Засаг дарга бөгөөд Улаанбаатар хотын захирагчид нэр дэвшигчийн томилгоог хэлэлцэж эхэллээ.
НИТХ дахь МАН-ын бүлгээс УИХ-ын гишүүн асан Су.Батболдыг нийслэлийн Засаг дарга бөгөөд Улаанбаатар хотын захирагчид нэр дэвшүүлсэн шийдвэрийг бүлгийн дарга Д.Амарбаясгалан танилцуулав. Нэр дэвшигчээс төлөөлөгчид асуулт асууж, хариултаа авлаа.
Төлөөлөгч Д.Баттулга: Нэр дэвшүүлж байгаа намаас асуумаар байна. 1990 оноос хойш анх удаа төлөөлөгч биш хүнийг нэр дэвшүүлж байна. Нийслэлийн нам 2016 оны сонгуульд нийслэлээ аз жаргалтай хот болгоно, оюунлаг залуусаа дэвшүүлж байна гэсэн. Би тэгж ойлгосон. Нэр дэвшсэн нөхөд их том бэрхшээл сорилтыг давж энд орсон. Манай намынхан хүчтэй өрсөлдөгчид байсан. Тэдэнтэй өрсөлдөөд орж ирсэн хүмүүсийг яагаад нэр дэвшүүлэхгүй байгаа юм бэ. Гаднаас нэр дэвшүүлж байгаа нь ямар учиртай юм бэ. Энд байгаа төлөөлөгчдөдөө итгэхгүй байгаа юм уу?
МАН-ын бүлгийн дарга Д.Амарбаясгалан: Нэр дэвшүүлэх процессоо МАН олон түвшинд ярьж гаргадаг. МАН-ын Удирдах зөвлөл, нийслэлийн МАН, МАН-ын бүлэг хэлэлцээд Су.Батболдын нэрийг дэвшүүлж байгаа. Яамдтай холбогдож, шууд ажлаа явуулах боломж, туршлагатай хүн. Нутгийн удирдлагын чиглэлээр 10-аад жил ажилласан. Орон нутгийн удирдах байгууллага, НИТХ Засаг даргын хоорондын уялдаа холбоонд илүү санаачилгатай ажиллах хүн гэж үзсэн.
Төлөөлөгч Б.Түвшин: Та гаднаас нэр дэвшиж байгаа гэдгээрээ онцлог. 34 хүн таныг шахаанд оруулахад та шударга ажиллаж чадах уу? Үүнд ямар баталгаа өгөх вэ?
Су.Батболд: Би удирдагчийн гараагаа аймгийн ИТХ-д сонгогдож эхэлж байсан. Аймаг, нийслэлийн ИТХ-д сонгогдоход ямар ажил хийхийг би залуу насандаа мэднэ. Төлөөлөгч биш гээд та бүхэн ад үзэхгүй болов уу гэж найдаж байна. Бидний санаа бодол нийслэлийн төлөө л байна. Би нийслэлийн эрх ашгийн төлөө манай, танай нам гэхгүй. Аль нэр дүүрэг хорооноос гарсан хүн шиг ажиллана. Би шударга бус зүйл, авлига хээл хахуулын эсрэг хатуу тэмцэнэ. Өөрийнхөө багт ийм хүмүүсийг авч ажиллана. Би Монгол Улсын төр захиргааны байгууллагад 26 дахь жилдээ ажиллаж байна. Нийслэлийн удирдлагад нэр дэвшиж байгаа нь Монгол төрд шударга ажиллаж байсны илрэл гэж бодож байна.
Төлөөлөгч Л.Нарантуяа: НИТХ-ын шийдвэрийг хэрэгжүүлдэг гол ноён нуруу. Миний харж байгаагаар Засаг дарга бол маш сайн удирдагч байх ёстой. Нийслэлийн байгууллагуудыг хэрхэн удирдах вэ?
Су.Батболд: Засаг дарга бол нэг талдаа засаг төрийн төлөөлөгч. Нөгөө талаас нутгийн удирдлагын байгууллагын өмнө үүрэг хүлээсэн хүн. Тиймээс НИТХ-аас гарсан аливаа шийдвэрийн биелэлтийг өөрийн биеэр хариуцна. Хотын дарга бол улс төр, захиргааны албан тушаал гэхээсээ илүү аж ахуйн ажил.
Төлөөлөгч Ц.Одонтунгалаг: Төрийн албан хаагчид маш их түгшүүртэй байна. Төрийн албан хаагчдыг тогтвортой ажиллуулах тал дээр ямар бодлого барих вэ?
Су.Батболд: Монгол төрийн өнөөдрийн тулгамдсан асуудал бол төрийн албаны тогтвортой бус байдал. Төрийн албаны хуулинд заасан хэм хэмжээгээр төрийн албан хаагчидтай ажиллана.
В.Бат