Үндэсний баяр наадмын хүчит бөхийн барилдаанд Архангай аймгийн Хашаат сумын харьяат “Бөхбилэгт” дэвжээ, Уулын баяжуулах “Эрдэнэт” үйлдвэрийн “Хангарьд” спорт хороо, “Ажнай” корпорацийн бөх улсын заан Ч.Санжаадамба 10 даван түрүүлж, Улсын аварга болсон. Харин Архангай аймгийн Булган сумын харьяат Алдар спорт хороо, Бөхбилэгт дэвжээ, Их засаг их сургуулийн бөх улсын өсөх идэр начин Р.Пүрэвдагва үзүүрлэн, улсын арслан цол хүртсэн юм.
Тэдний цолыг мялааж, Архангай аймгийн “Бөхбилэгт” дэвжээнээс цагаан өнгийн жийп автомашин бэлэглэлээ.
Машины түлхүүрийг “Бөхбилэгт” дэвжээний тэргүүн УИХ-ын гишүүн Ж.Мөнхбат тэргүүтэй хүмүүс Хүй долоон худагт болж буй уяачдын наадмын үеэр гардуулав.
Энэ үеэр аварга Ч.Санжаадамба “нутгийн зон олонтой баярлаж талархаж байгаагаа илэрхийлж, энэ том цолыг дааж явна” хэмээн сэтгэгдлээ хуваалцлаа.
В.Бат