Өнөөдөр Батлан хамгаалахын сайд Ц.Цолмон Үндэсний их баяр наадамд зодоглосон “Алдар” спорт хорооны бөхчүүдэд хүндэтгэл үзүүлж, хүлээн авч уулзлаа. Энэ үеэр Үндэсний их баяр наадамд түрүүлсэн Улсын аварга Ч.Санжаадамба, үзүүрлэсэн Улсын арслан Р.Пүрэвдагва нарт хоёр өрөө байрны түлхүүрийг мөнгөн аяга, батламжийн хамт гардуулан өгөв.
“Алдар” спорт хорооны бөхчүүд энэ жилийн Үндэсний их баяр наадамд амжилттай оролцож, аварга, арслан, харцага, начин цолны болзол хангаж өнгөтэй сайхан наадсан билээ. Батлан хамгаалахын сайд Ц.Цолмон амжилттай барилдаж, цолоо ахиулсан Улсын харцага, Зэвсэгт хүчний 350 дугаар ангийн ахлагч Б.Бат-Өлзий, Улсын харцага, Зэвсэгт хүчний 017 дугаар ангийн ахлагч Х.Гантулга нарын бөхийг хүлээн авч уулзан, шагнан урамшууллаа.
Түүнчлэн урианхай сурын харваанд тэргүүлсэн “Алдар” спорт хорооны тамирчин Ж.Энхбат, Халх сурын харваанд “Алдар” спорт хорооны тамричин Д.Норжмаа нарт хүндэтгэл үзүүлэх байсан ч наадам давхацсан тул ирж амжаагүй ажээ.
Г.Тэгшсүрэн
Уншиж байна |