Засгийн газрын бүтэц, бүрэлдэхүүнийг өнөөдөр хэлэлцэн батална. Ажлын цаг дууссаны дараа, шөнөөр хуралдсан УИХ-ын анхдугаар чуулган Засгийн газрын бүтцийг хэлэлцэхийг дэмжлээ. Ж.Эрдэнэбатын Засгийн газар 16 сайд, 13 яамтай байхаар бүтэц, бүрэлдэхүүний тухай хуулийн төслийг өргөн барьсан.
Төрийн байгуулалтын байнгын хороогоор өнөөдөр хэлэлцэж, анхны хэлэлцүүлгээр батална. Шинэ Засгийн газарт үндсэн чиглэлийн яаманд Хөдөлмөр, нийгмийн хамгааллын яамыг нэмснийг Ерөнхийлөгч дэмжээгүй. Энэ нь давхар дээлтэй гишүүний тоог нэмэгдүүлж байна гэж шүүмжилсэн бол эрх баригч хүчин МАН “Хөдөлмөр, нийгмийн хамгааллын яам манай намын мөрийн хөтөлбөрийг хэрэгжүүлэх тулгуур яам” хэмээн тайлбарлаж байгаа юм.
Энэ Засгийн газар 10 тохируулагч, 17 хэрэгжүүлэгч агентлагтай байхаар хуулийн төсөлдөө тусгасан. Мөн Ерөнхийлөгчийн зүгээс агентлагуудын нэрийг өөрчлөх, нэгтгэх, татах буулгах зэрэг өөрчлөлт оруулсныг төрийн албаны тогтвортой байдалд сөргөөр нөлөөлсөн гэж байр сууриа илэрхийлээд байгаа юм.
Засгийн газрын бүтэц, бүрэлдэхүүний хуулийг хэлэлцэн батлахтай зэрэгцээд сайд нарын томилгооны тохироо ч эцсийн байдлаар хийгджээ. Ерөнхий сайд Ж.Эрдэнэбатын Засгийн газарт
Монгол Улсын Шадар сайдаар У.Хүрэлсүх,
Монгол Улсын сайд, Засгийн газрын Хэрэг эрхлэх газрын даргаар МАН-ын Ерөнхий нарийн бичгийн дарга Ж.Мөнхбат,
Сангийн сайдаар УИХ-ын гишүүн С.Бямбацогт,
Байгаль орчин, аялал жуулчлалын сайдад УИХ-ын гишүүн Д.Оюунхорол,
Гадаад харилцааны сайдаар УИХ-ын гишүүн Н.Энхболд,
Хууль зүй, дотоод хэргийн сайдаар УИХ-ын гишүүн Б.Бат-Эрдэнэ томилогдох тохироо бүрдсэн гэсэн бор шувуу ордноор тарсан. Мөн Энэ Засгийн газар Хөдөлмөр, нийгмийн хамгааллын яамыг үндсэн чиг үүргийн яамд хамруулахаар болсон. Энэ салбарын сайдаар УИХ-ын гишүүн Н.Номтойбаяр томилогдох нь мөн тохироо хийгдсэн аж.
Дээрх улс төрийн тохироо бүрдэн томилогдохоор болсон сайд нараас мэргэжлийн Засгийн газарт мэргэшээгүй сайдад УИХ-ын гишүүн Ж.Мөнхбат, Б.Бат-Эрдэнэ нарыг онцолж, олон нийт шүүмжлэлтэй хандаж байгаа юм. Хөдөлмөр, нийгмийн хамгааллын сайдаар “торгонд ороолгож, тосонд хөлбөрч өссөн” бэлтэй айлын хүү Н.Номтойбаярыг томилохоор болсныг мөн нийгмийн зүгээс шүүмжилж байгаа юм. Ерөнхий сайдын хэлж байснаар Засгийн газрын “давхар дээл”-тэй сайдууд үндсэн чиг үүргийн яамдаар хязгаарлагдана.
Чиглэлийн яамдаас Барилга, хот байгуулалтын сайдаар УИХ-ын экс гишүүн Ц.Дашдорж,
Зам, тээврийн сайдаар “Өндөр буянт” компанийн захирал Н.Төмөрхүү,
Уул уурхай, хүнд үйлдвэрийн сайдаар УИХ-ын экс гишүүн Т.Очирхүү,
Хүнс, хөдөө аж ахуй, хөнгөн үйлдвэрийн сайдад МАН-ын нарийн бичгийн дарга Т.Гантулга,
Эрүүл мэндийн сайдаар Ц.Цолмон нарыг томилох сураг гарсан.
Гэхдээ МАН-ын Удирдах зөвлөлөөс дэд сайд байсан Ц.Цолмонг ЭМ-ийн сайдаар томилох асуудлыг хэлэлцэхэд дэмжлэг аваагүй гэх яриа байна.
Өнөөдөр УИХ-аар Засгийн газрын бүтэц бүрэлдэхүүнийг баталвал маргааш сайд нарын нэрийг өргөн барьж, батлуулах магадлалтай гэж ажиглагчид үзэж байна.
Ямартай ч МАН-ын Засгийн газар энэ долоо хоногт бүрэлдэж, үйл ажиллагаагаа эхлүүлэх төлөвтэй.
Н.Энхлэн