УИХ-ын чуулганы нэгдсэн хуралдаан эхэллээ. Энэ өдрийн хуралдаанаар Төрийн албаны зөвлөлийн зарим гишүүнийг чөлөөлж, томилох асуудлыг хэлэлцэнэ. Уг асуудлыг хэлэлцсэнээр анхдугаар чуулганыг хаах юм.
Төрийн албаны зөвлөлийн хоёр гишүүнийг чөлөөлөх асуудлаар УИХ дахь АН-ын бүлэг завсарлага авсан. Завсарлагын талаар УИХ дахь АН-ын бүлгийн дарга С.Эрдэнэ үг хэлэв.
АН-ын бүлгийн дарга С.Эрдэнэ: Өнөөдөр хэлэлцэж байгаа асуудал нь хууль бус үйлдэл. Төрийн албаны тухай хуулинд зааснаар Төрийн албаны зөвлөлийн гишүүнийг 6 жилийн хугацаатай томилдог. Хуулийн дагуу бүрэн эрхийн хугацаа нь дуусаагүй байгаа гишүүдийг чөлөөлөх гэж байгаа нь хууль бус. Мөн энэ хоёр хүн ээлжийн амралттай байгаа. Албан ёсны өргөдлөө ч өгөөгүй байгаа энэ үед МАН хэт олонхдоо эрдэж, аливаа асуудлыг хууль бусаар шийддэг алхмынхаа эхлэлийг тавьж байна. Төрийн алба тогтвортой байх ёстой. Хэт олонхдоо эрдэж, төрийн албыг хүчгүйдүүлэх, хууль бусаар авах, солих үйлдлийг дэмжихгүй. Тиймээс төрийн албаны зөвлөлийн хоёр гишүүнийг чөлөөлж, томилох хууль бус үйлдлээ таслан зогсоохыг МАН-аас шаардаж байна гэв.
Харин УИХ-ын дарга АН-ын бүлгийн шаардлагыг хүлээн авсангүй, Төрийн албаны зөвлөлийн гишүүдийг чөлөөлж, томилох асуудлыг хэлэлцэж эхэллээ.
В.Бат