Ерөнхий сайд Ж.Эрдэнэбатын тэргүүлсэн Засгийн газар өчигдрийн хуралдаанаараа дэд сайдуудыг томилсон билээ. Батлан хамгаалахын дэд сайдаар Т.Дуламдоржийг томилсон бөгөөд тэрбээр өнөөдөр яамны бие бүрэлдэхүүн, газар, хэлтсийнхэнтэй уулзаж, ажилдаа орлоо.

Бие бүрэлдэхүүнтэй хийсэн уулзалтад УИХ, Засгийн газрын гишүүн, Батлан хамгаалахын сайд Б.Бат-Эрдэнэ болон Батлан хамгаалах яамны Төрийн нарийн бичгийн дарга, хурандаа Б.Батсайхан нар оролцов. Батлан хамгаалахын сайд Б.Бат-Эрдэнэ дэд сайд Т.Дуламдоржийн ажлын туршлагын талаар танилцуулж, гар нийлэн хамтран ажиллахдаа таатай байгааг илэрхийлсэн. Дэд сайд Т.Дуламдорж "Батлан хамгаалах хэмээх энэ сайхан салбарын хариуцлагатай албанд томилогдлоо. Миний хувьд энэ салбарын хөгжил цэцэглэлтийн төлөө өөрийгөө зориулж ажиллахад бэлэн байна. Нийгмийн тэргүүлэгч салбар нь болж байгаа та бүхэнтэй гар нийлэн ажиллана. Хамгийн гол нь нэг зүйлийг та бүхнээс захих байна. Салбарын хөгжлийн төлөөх ажил хэрэгч санал санаачилга боловсруулж танилцуулж байвал бид дэмжих болно" гэжээ.