Наймдугаар сарын 7-нд буюу "Рио-2016" наадмын хоёр дахь өдөр жүдо бөхийн 66 кг-ын жингийн барилдаанууд явагдана. Энэ жинд Хил хамгаалах ерөнхий газрын Хилчин спорт хороо, Женко клубийн тамирчин ОУХМ Даваадоржийн Төмөрхүлэг зодоглоно. Тэрбээр дэлхийн чансааны хоёрдугаарт бичигдэж байгаа бөгөөд сугалаанд С хэсгийг тэргүүлэн барилдана.

Түүнтэй тэмцээний чансааны долоод Азербайжаны Нижат Шихализада орох бөгөөд хэсгийн гол өрсөлдөгчөөр нэрлэгдэж байгаа юм. Манай бөх хэсгээ тэргүүлбэл D хэсгийн аваргатай хагас шигшээд учраа таарах бөгөөд тус хэсгийг ДАШТ-ий хошой мөнгөн медальт ОХУ-ын Михайл Пудьяев тэргүүлэн барилдана. Түүнтэй D хэсэгт ДАШТ-ий хүрэлтэй Израйлын Голан Поллак хуваарилагдах юм. Харин А хэсгийг дэлхийн шинэ аварга БНСУ-ын Ан Баул тэргүүлэх бөгөөд Европын аварга Гүржийн залуу од Ваза Маргвелашвилитэй хамт хуваарилагдсан. Мөн дэлхийн аварга Украины Георгий Зантария, Японы алдарт бөх дэлхийн гурван удаагийн аварга Масааши Эбинүма нар В хэсэгт оноолт таарах нь тодорхой болоод байна.

Жүдо бөхийн 66 кг-ын жинд 35 бөх барилдана.

Г.Тэгшсүрэн