Манай улсын жүдо бөхийн шигшээ багийн тамирчин ОУХМ Л.Отгонбаатар “Рио-2016” олимпийн наадамд -90кг-д өрсөлдсөн. Тэрбээр хүрэл медалийн төлөөх барилдааны үеэр гэмтэл авчээ. Улмаар өнөөдөр Рио Де Жанейро хотноо яаралтай хагалгаанд орохоор болсон байна.
Л.Отгонбаатар хэсгийн аваргын төлөөх барилдаанд Дэлхийн аваргын хошой мөнгөн медальт, Гүржийн жүдоч Варлам Липартелианитай хүч үзэж манай тамирчин торгуулиар хожигдсон. Энэ барилдааны үеэр зүүн сууж үүрэхдээ нэлээд хүнд гэмтэл авсан аж. Рио Де Жанейро хотын эмч нар түүний бэртлийг зүүн мөрний шөрмөс тасарч, мах нь ханзарч, мөрний аяганы хүүдий урагдсан гэсэн дүгнэлт гаргажээ.
Энэ талаар жүдо бөхийн шигшээ багийн дасгалжуулагч Г.Дашдаваа “3.5 см тасарсан шөрмөс залгах хагалгаа хийх юм. Хагалгаа 2-3 цаг орчим үргэлжилнэ гэсэн. Олимпийн наадамд оролцож байгаад гэмтэл авсан учраас зардал мөнгийг нь Бразилийн талаас хариуцна. Хагалгааны дараа гурав хоног эмнэлэгт хэвтэх ёстой. Хагалгааны дараа гурван сар орчим бэлтгэл хийхгүй гам барина” хэмээсэн байна.
Л.Отгонбаатар өнөөдөр 14.00 цагт хагалгаанд орох юм байна.
Г.Тэгшсүрэн
Уншиж байна |