Монгол Улсын Ерөнхий сайд Ж.Эрдэнэбат өчигдөр Төрийн албан хаагчдын цалинг бууруулах, иргэдээ ажилтай байлгах бодлого баримтлан ажиллах тухай мэдээлсэн. Энэхүү мэдээллийг УИХ дахь Ардчилсан намын бүлгийн гишүүд хууль зөрчсөн гэж үзэж буйгаа өнөөдөр мэдэгдлээ. Хэвлэлийн хуралд УИХ-ын гишүүн С.Эрдэнэ, З.Нарантуяа нар оролцов.
Төрийн албан хаагчдын цалин бууруулах нь Төрийн албаны тухай хуулийн 38 дугаар зүйлийн 2-т заасан “Төрийн албаны зардлыг бууруулах арга хэмжээ авч төсвийн санхүүжилтийг хорогдуулах нь төрөөс олгож байгаа төрийн албан хаагчдад олгох төлбөрийг түр буюу бүрмөсөн зогсоох, тэдний цалин хөлс, нөхөх төлбөр, тусламж, тэтгэвэр, тэтгэмжийн хэмжээг бууруулах үндэслэл болохгүй” гэсэн заалтыг ноцтой зөрчихөөр байна гэж үзэж буйгаа УИХ-ын гишүүн С.Эрдэнэ мэдэгдэв.
Мөн тэрбээр “2016 оны УИХ-ын ээлжит сонгуулийн үр дүнд олонх болсон Монгол Ардын намын мөрийн хөтөлбөрийн 1.4.7-т заасан “Цалин, тэтгэвэр, тэтгэмжийг үе шаттай нэмэгдүүлэн, хөдөлмөр эрхлэлтийг дэмжих замаар өрхийн дундаж орлогыг өсгөх бодлого баримтална” заалтыг зөрчиж байгаа тул ард түмэнд амласан мөрийн хөтөлбөрөө биелүүлэх ёстой гэж үзэж байна” хэмээв.
Улсын хэмжээнд нийт 180.000 гаруй төрийн албан хаагч байдаг байна. Ардчилсан намын гишүүд эдгээр ажилчдын цалинг бууруулахын оронд дэд сайд нарын зардал, Ерөнхий сайдын өрөөний засвар зэрэгт хэрэглэгдэх зардлаас танах нь зөв гэж үзэж байгаа аж.
Засгийн газрын хуралдаанаар “Сайн” хөтөлбөрийг зогсоох шийдвэр гаргасан. Энэ талаар УИХ-ын гишүүн З.Нарантуяа “Улсын төсөвт ямар ч дарамт учруулахгүй банк, иргэдийн хооронд бизнесийн зарчимд тулгуурлаж хэрэгжиж байгаа иргэдийн хамгийн ихээр хүсч байгаа эдгээр хөтөлбөрийг зогсоож байгааг бодлогын хувьд том алдаа гэж үзэж байна” хэмээн ярилаа.
Г.Тэгшсүрэн