Монголын чөлөөт бөхийн Мастеруудын холбооны гишүүн Д.Алтанхуяг нарын хүмүүс мэдээлэл хийлээ. Тэд “Рио-2016” олимпийн чөлөөт бөхийн эрэгтэйчүүдийн 65 кг-д өрсөлдсөн МУГТ Г.Мандахнаранд шижир алтаар цутгасан медаль бэлэглэхээр хандив цуглуулж эхэлжээ.
Г.Мандахнаран дагах барилдаан хийж, хүрэл медалийн төлөө ДАШТ-ий мөнгө, Азийн наадмын хүрэл, Азийн АШТ-ий мөнгө, хүрэл медальт, Узбекстаны Наврузовтай барилдсан. Шүүгчид Узбекстаны бөхөд ялалтыг өгсөн. Уг ялалтыг Монголын чөлөөт бөхийн Мастеруудын холбооны төлөөллүүд үгүйсгэж, манай тамирчин медалиа луйвардуулсан гэж үзэж буйгаа илэрхийлэв. Тиймээс ч Г.Мандахнаранг урамшуулах зорилгоор энэ сарыг 28-ныг хүртэл таван хоногийн аяныг эхлүүлжээ.
Аяны талаар тус холбооны гишүүн Д.Алтанхуяг “Г.Мандахнаран ялсан. Харамсалтай нь хүрэл медалиа шүүгчдийн булхиагаар луйвардуулсан. Тиймээс түүнийг дэмжих, зорилгоор энэ аянг өрнүүлж байна. Хандив өргөхийг хүссэн иргэд Хаан банкны 5085192505 тоот дансанд өргөх боломжтой. Хандиваар нийт хэдэн төгрөг цугласан талаарх бүх мэдээллийг цаг тухайд нь шуурхай, дэлгэрэнгүй хүргэнэ. Монголын ард түмнээ энэ аянд идэвхитэй оролцохыг уриалъя” хэмээв.
Г.Мандахнаранд шижир алтаар цутгасан медалиа энэ сарын 29-нд Спортын төв ордны өмнө гардуулах ажээ. Одоогоор нийт 20 сая төгрөг цуглаад байгаа юм байна.
Г.Тэгшсүрэн