Хөдөлмөр, нийгмийн хамгааллын сайд Н.Номтойбаяр Паралимпийн тамирчдыг хүлээн авч уулзлаа. Баг тамирчдыг салбарын цол тэмдгээр шагнан урамшуулав.
Н.Номтойбаяр тамирчдад баяр хүргэж “Цаашдаа улам их амжилт гарган олон залуусын амьдрах итгэл зоригийг өдөөж, урам өгч яваарай. Дараа дараагийн тэмцээн уралдаандаа амжилт гаргаарай. Яамны зүгээс дэмжиж ажиллах болно” гэж хэллээ.
Энэ үеэр Монголын Паралимпийн холбооны ерөнхий нарийн бичгийн дарга Н.Оюунбат “Олимп тухайн улсын хөгжил дэвшил, байр суурь, технологийн чадамжийг нь харуулдаг. Харин паралимп оюун санаа, ухамсрын дэвшлээ харуулдгаараа онцлог. 1988 оны Сөүлийн олимпоос хойш Өвөл, зуны олимпод Паралимпийг зохион байгуулдаг болсноос хойш энэ удаагийн олимп бидний хувьд хамгийн сайхан наадам болж өнгөрлөө” хэмээв.
Энэ удаагийн наадамд дэлхийн 170 орны 4000 гаруй тамирчин спортын 23 төрөлд 528 багц медалийн төлөө өрсөлдсөн. Монголын баг тамирчдын хувьд спортын 5 төрөлд 8 тамирчин, 6 дасгалжуулагч, 1 багийн ахлагч, 1 эмч, 1 багийн бэлтгэл хангагч гэсэн 18 хүний бүрэлдэхүүнтэйгээр наадамд оролцсон.
Улмаар жүдогийн төрлөөр Б.Ууганхүү, паэрлифтингийн төрлөөр Э.Содномпэлжээ нар хүрэл медаль хүртсэн амжилттайгаар эх орондоо ирсэн юм.
Г.Тэгшсүрэн
Уншиж байна |