УИХ дахь МАН-ын бүлгийн хурлаар ямар асуудлууд хэлэлцсэн талаар тус намын бүлгийн дарга Ө.Энхтүвшинээс тодрууллаа.
-МАН-ын бүлгийн хуралдаанаар өнөөдөр ямар асуудлууд хэлэлцэн, шийдвэрлэсэн бэ?
-Монгол Улсын Ерөнхийлөгч, Засгийн газраас өргөн барьсан Хэвлэлийн эрх чөлөөний тухай хуулийн төслүүдийг өнөөдрийн МАН-ын бүлгийн хуралдааны эхэнд хэлэлцлээ. Агуулгын хувьд нэлээд ойролцоо уг төслүүдийн талаар бид ярилцаж, хууль санаачлагчид өөрсдөө зөвшөөрч байгаа тул нэгтгэж хэлэлцэх нь зүйтэй гэдэг дээр санал нэгдсэн. Энэ хуулийн төсөл дээр нэлээд ач холбогдол өгч байгаа учир МАН-ын бүлгээс ажлын хэсэг гарган, хэлэлцэхээр боллоо.
-Валютын ханшны үнийн өсөлтийн асуудлыг хэрхэн шийдсэн бэ?
Валютын ханшны өсөлт, бараа бүтээгдэхүүн ялангуяа шатахууны үнийн өсөлт, үүнийг үүсгэж байгаа шалтгаан, цаашид ямар арга хэмжээ авах талаар бүлгийн гишүүд санал солилцлоо. Ингээд юуны түрүүнд ийм асуудал үүсгэж байгаа шалтгааныг олох шаардлагатай гэж үзэж, Монголбанкны үйл ажиллагаатай танилцаж, мэдээлэл авах үүрэг бүхий гурван хүний бүрэлдэхүүнтэй ажлын хэсэг гарган ажиллуулахаар боллоо. Улмаар маргааш Монголбанкин дээр ажиллаж байгаа ажлын хэсгийн дүгнэлтийг болон Монголбанкны Ерөнхийлөгчийн мэдэгдлийг сонсох болно. Энэ үеэр мөн Засгийн газрын үйл ажиллагааны төлөвлөгөөг сонсоё гэж үзлээ. Тэртэй тэргүй бусад мэдээллийг хэвлэл мэдээллийн хэрэгсэлээр дамжуулан иргэд мэдээлэлтэй болсон тул ямар хүчин зүйлээс үүдэн энэ асуудал үүсэв, ойрын үед дээрх асуудлаар Монгол Улсын Засгийн газар ямар арга хэмжээ авах гэж байна гэдгийг сонсох нь зүйтэй гэж үзсэн. Энэ асуудлаар Засгийн газар өнөөдөр хуралдсан. Маргааш 12.00 цаг гэхэд МАН-ын бүлэг дээр ойрын хугацаанд авах арга хэмжээнийхээ талаархи төслөө танилцуулахаар тохирсон.
-Монголбанкны Ерөнхийлөгч болон ЭБЭХ-ний дэд сайдыг огцруулах асуудал АН-ын бүлгийн хурал дээр хөндөгдсөн. Энэ асуудлын хувьд?
-Өнөөдрийн байдлаар ганц, нэг хүний хийсэн мэдээлэл дээр үндэслэж, үүнд хариуцлага тооцож, тэрийг халах нь зүйтэй гэсэн чиглэлийг бүлгээс өгөх нь өнөөдөртөө эрт байна гэж бид үзсэн. Асуудлыг тал бүрээс нь харж, эрх бүхий байгууллагынхан авах гэж байгаа арга хэмжээг нь сонсож байж шийдвэрээ гаргах нь зүйтэй гэж бид үзэж байна.
-Энэ байдалд улс төрийн зарим хүчин зүйл нөлөөлж байгаа гэсэн шуум гарсан. Энэ талаар?
-Ийм хар бидэнд төрж байна. Ардчилсан намын бүлэг Засгийн газраас гарах тухайгаа мэдэгдээд байгаа. Түүний дараахан өнгөрсөн долоо хоногийн баасан гарагт ЭБЭХЯ-н дээр байдаг дэд сайд Б.Ариунсангийн ахалдаг үнийн зөвшилцлийн комисс хуралдаж, шатахууны үнийг 230-260 төгрөгөөр нэмэх нь зүйтэй гэдэг шийдвэрийг энэ ажлын хэсэг зөвшөөрсөн байна. Үүний дагуу энэ үнийн өсөлт гарсан байна. Тиймээс дээрх мэдээллүүдийг нягтлах шаардлага байна. Өнөөдөр Засгийн газраас тодорхой сайд нар гарлаа ч гэсэн ажлууд цааш нь хийгдээд явах ёстой. Зөвшилцлийн гэрээгээрээ ажлаа хийгээд явах ёстой. Ард түмэнд амалсан зүйлээ хийж байх ёстой гэдэг дээр бид хатуу байр суурьтай байгаа.
С.Заяа