Өнгөрсөн долоо хоногт Яаралтай түргэн тусламжийн эмч төрөх өвдөлт өгсөн эмэгтэйг чимхсэн гэх асуудал гарсан. Энэ талаар Нийслэлийн эрүүл мэндийн газрын мэргэжлийн удирдлага, бодлогын хэрэгжилтийг зохицуулах хэлтсийн дарга Т.Хулан, НЯТТ-ийн захирал С.Ариунболд, тус төвийн дуудлагын эмч Г.Алтанчулуун, “Өргөө” амаржих газрын эмч А.Ганчимэг нар мэдээлэл хийлээ.
Болсон явдлыг сөхвөл есдүгээр сарын 27-нд 10.57 цагт Т.Мягмарсүрэн гэх эмэгтэй төрөхөөр өвдөж, Нийслэлийн яаралтай түргэн тусламжийн төвд дуудлага өгчээ. Улмаар дуудлагаар ирсэн түргэний эмч эмнэлэгт хүргэж амжина гэдгийг үзлэгээр тогтоож тээвэрлэсэн байна. Эмнэлэгт хүргэгдэх хугацаанд эх 4-5 удаа өвдөлт өгч байсан ч түргэний эмч “Машинд төрж болохгүй” хэмээн чимхсэн гэх асуудал гарсан.
Үүнд тус өдөр дуудлагаар үйлчилсэн НЯТТ-ийн эмч Г.Алтанчулуун “Би чимхээгүй. Эмэгтэйн бие яагаад хөхөрсөн учрыг би мэдэхгүй байна” гэх тайлбарыг хэлж байна.
Эхийн гуя улайж хөхөрсөн байсан
“Өргөө” амаржих газрын эмч А.Ганчимэг
-Эх 11.30 цагийн орчим Яаралтай түргэн тусламжаар ирсэн. Хүлээн авахаар эх насилктай орж ирсэн ч ор руу хөлөөрөө босож явсан. Орон дээр гарч хувцсыг нь тайлах үед дүлэлт ихэссэн. Умайн хүзүү бүрэн нээгдсэн байсан учир ургын толгой цухалзаж эхэлдэг. Эхийг төрүүлэхийн тулд хувцсыг нь тайлна. Хувцсыг тайлахад эхийн гуя орчим улайж, хөхөрсөн байсан. Асуухад 103-ын эмч чимхсэн гэдэг үгийг хэлсэн. Улмаар эх, хүүхэд эсэн мэнд амаржсан. Нярайг нярайн тасаг руу эхийг төрөх өрөө рүү шилжүүлсэн байгаа. Би эмч мэргэжлээр гурван жил ажиллаж байна. Өмнө нь төрөхөөр ирсэн эхийн хөл нь хөхөрсөн тохиолдол гарч байгаагүй. Гэхдээ эхчүүд өвдөлтөө даван туулахын тулд өөрийгөө хазах, чимхэх тохиолдол байдаг. Хүн хүний онцлог өөр.
Гэртээ болон автомашинд 88 эх амаржсан
НЯТТ-ийн захирал С.Ариунболд
-Дуудлага есдүгээр сарын 27-нд 10.57 минутад ирсэн. Тухайн дуудлагыг СХД-ийн салбар хүлээн авч ойр яваа эмч есөн минутын дараа айлд очсон. Эмч 5-8 минутад айлд үзлэг хийсэн. Улмаар 16 минутын дараа “Өргөө” амаржих газар тээвэрлэж хүргэсэн. Иймд дуудлага хожимдсон зүйл байхгүй. Мөн дуудлагаар очсон эмч биед нь халдаагүй. Түргэн тусламжийн эмч хумс урт ургуулахыг хориглодог. Биед нь халдсан байлаа гэхэд хурдан хугацаанд хөхрөлт үүсдэггүй. Түргэн тусламжийн төв өдөрт 1000-1200 дуудлага хүлээн авдаг. Үүний 8.5 хувь нь төрөх дуудлага байдаг. Өнөөдрийн байдлаар мана төв Нийслэлийн хэмжээнд 18 мянга орчим төрөх дуудлагад үйлчилсэн. Үүний 0.7 орчим хувь нь гэрийн төрөлт байна. Энэ нь хугацаа хожимдох тулгаж дуудлага өгсөн зэргээс шалтгаалсан байна. Он гарснаас хойш нийт 88 эх гэртээ болон автомашинд төрсөн тохиолдол байна. Энэ тохиолдлуудад эмч чимхсэн гэх асуудал үүсэж байгаагүй.
Харин Нийслэлийн эрүүл мэндийн газрын мэргэжлийн удирдлага, бодлогын хэрэгжилтийг зохицуулах хэлтсийн дарга "Өнгөрсөн өдрүүдэд түргэн тусламжийн эмчтэй холбоотой ташаа мэдээлэл цахим ертөнцөд ихээхэн гарч байна. Бид энэ асуудлаар өнөөдөр үнэн, зөв эсэхийг нь хэлэхийг урьтал болгосонгүй. Харин болсон үйл явдлыг баримттай мэдээлэхийг хүслээ. Сүүлийн үед эрүүл мэндийн салбар руу дайрч давшилсан гуйвуулсан мэдээлэл ихээхэн гарах боллоо" хэмээв.
Одоогоор НЯТТ-ийн ажилтнууд энэ асуудлыг шийдүүлэхээр Шүүхийн байгууллагад хандсан байгаа аж. Мөн чимхүүлсэн гэх эмэгтэй шүүхэд гомдол гаргажээ.
Г.Тэгшсүрэн