Энэ сарын 7-нд Монголын мэргэжлийн анчдын холбооны тэргүүн Д.Хурцгэрэл нарын хүмүүс гадаадын анчид угалз, шонхор зэрэг ан амьтныг хууль бусаар агнаж байгаа тухай мэдээлсэн. Тэгвэл өнөөдөр БОАЖ-ын яамнаас хариу мэдээлэл хийлээ.

Мэргэжлийн анчдын холбооны тэргүүн Д.Хурцгэрэл Засгийн газраас нууц тогтоол гаргаж шонхор шувуу болон угалзыг хууль бусаар хил давуулсаар байгаа тухай хэлсэн.  Хууль бус ан, нууц тогтоол, гадаадын иргэдийн ан, агнуурын зөвшөөрөлд БОАЖ-ын сайд Д.Оюунхорол буруутай гэж үзэж байгаагаа илэрхийлсэн юм.

Үүнд БОАЖ-ын яамны Хүрээлэн буй орчин байгалийн нөөцийн удирдлагын газрын дарга Д.Даваасамба “Энэ жил өндөр дээд хэмжээний уулзалтад оролцохоор ирсэн булангийн орны зарим төлөөлөгчид шонхор барих зөвшөөрлийг Засгийн газраас гаргасан. Энэ тогтоолын дагуу манай яамтай гэрээ байгуулж холбогдох дүрмийн дагуу төлбөрөө төлж барьсан” гэдэг тайлбарыг хэлэв.

БОАЖ-ын дэд сайд Ц.Батбаяр “Яамны сайдын нэр хүндэд халдсан асуудал гэж ойлгож байна. Шонхор шувууг хил давуулах зөвшөөрлийг манай яам олгодоггүй. Засгийн газрын тогтоолд үндэслэж энэ ажлыг зохион байгуулдаг. Тийм учраас  сайд зөвшөөрөл олгож наймаа хийсэн гэдэг нь үндэслэлгүй гэдгийг албан ёсоор хэлье” хэмээв.

Иймд Мэргэжлийн анчдын холбооны тэргүүн Д.Хурцгэрэлийг ашиг сонирхлын зөрчлөөр сайд болон яамны нэр хүндэд халдан, худал мэдээлэл тарааж гүтгэсэн хэргээр шүүхэд өгч байгаагаа тэрбээр хэллээ.

Өнгөрсөн сард тус яамнаас шонхор шувууны чиглэлээр хэлэлцүүлэг зохион байгуулсан. Энэ үеэр судлаачид жилд 7-8 мянган шонхор хорогдож байгаа судалгааг танилцуулжээ. Хорогдлын гол шалтгаан нь цахилгааны шон дээр үүрээ засдагтай холбоотой гэж үзсэн байна. Улмаар устаж үгүй болж буйг барагдуулахаар шинжлэх ухааны байгууллагатай хамтран ажиллаж байгаа аж.

Аргал угалзын ангийн тухайд 2015 онд гаргасан Засгийн газрын тогтооолоор 2016 онд тусгай зориулалтаар угалз 60, тэх 70, халиун буга 30, саарал чоно 20, бор гөрөөс 10, зэрлэг гахай 10, цагаан зээр 150-ийг агнах тогтоол гаргажээ. Үүний дагуу БОАЖ-ын сайд тухайн тусгай зөвшөөрлөөр агнах тушаалыг гаргасан аж.

Хэвлэлийн хурлын дараа БОАЖ-ын яамны Хүрээлэн буй орчин байгалийн нөөцийн удирдлагын газрын дарга Д.Даваасамба сэтгүүлчдийн сонирхсон асуултад хариуллаа.

-Ашгийн бус зорилгоор хичнээн шонхор хил давсан бэ?

-Энэ бол засгийн нууц тогтоолоор хийгддэг ажил учраас тоог хэлэх боломжгүй.

-Яагаад нууцалдаг юм бол?

-Энэ асуудлыг засгийн газрын хэрэг эрхлэх газар мэднэ. Учир нь 2013 онд хориглосноос хойш 2014-2015 онд нууцын журмаар орсон. Тагнуулын ерөнхий газар руу тогтоол нь явж байгаа.

-216 шонхор бэлгэнд өгсөн гэх мэдээ байна?

-Засгийн газрын нууц тогтоолтой учраас тооны хувьд би сайн мэдэхгүй байна.

-БОАЖЯ үүнийг мэдэх ёстой биз дээ?

-Үүнийг манай нууцын эрхлэгч мэднэ. Гэхдээ хэлэх боломжгүй. Тагнуулын ерөнхий газар болон Цагдаагийн байгууллагад бүх мэдээлэл нь очиж байгаа.

-Нууц тогтоолын цаана нууцаар хууль бус ан агнуур хийгдэж байгаа бол яах вэ?

-Үүнийг хууль хяналтын байгууллага шалгана.

-Бэлэглэлийн журмаар гаргаж байгаа шонхорын нөхөн төлбөрт хэдэн төгрөг өгдөг вэ?

-Бэлэгдлийн журмаар гарч байгаа тохиолдолд үнэгүй байх ёстой. Гэхдээ гэрээ хийхэд нь бид нэг шонхороос орон нутгийн төсөвт 6 сая 400 мянга, Улсын тэмдэгтийн хураамж 3 сая 200 мянган төгрөг авдаг.

-Шонхороос өөр ямар амьтанд нууц тогтоол гаргадаг вэ?

-Өөр амьтан дээр гаргадаггүй. Зөвхөн шонхор дээр л гэж бодож байна.

-Д.Хурцгэрэл гэх иргэн сэрдхийлгэм зураг дэлгэлээ. Зурган дээрх анчдад ямар арга хэмжээ авах вэ?

-Бид байгаль орчны эсрэг гэмт хэрэгтэй тэмцэх хэлтсийн зургаадугаар тасгийнхантай ярьсан. Энэ асуудалд цагдаагийн байгууллага ажил хийж байгаа.

Г.Тэгшсүрэн