Улсын Их хурлаас есдүгээр сарын 7-ны өдөр 38 дугаар тогтоолыг батлан гаргасан. Энэхүү тогтоолоор санхүүгийн хүндрэлтэй байгаа одоогийн нөхцөл байдалтай нийцүүлэн хүүхдийн мөнгөний олголтыг амьжиргааны түвшнээс шалтгаалан хоёр өөр цаг хугацаанд олгохоор болсон. Энэ талаар Хөдөлмөр, халамжийн үйлчилгээний ерөнхий газраас мэдээлэл хийлээ.
Өрхийн мэдээллийн нэгдсэн санд байрлаж байгаа амьжиргааны түвшнии 502.567 гэсэн босго онооноос доогуур багтаж байгаа 660 мянган хүүхдэд хүүхдийн мөнгийг хуучин жишгээр бэлнээр олгож эхэлжээ. Харин үлдсэн 400 мянга орчим хүүхдэд хүүхдийн мөнгийг 2019 оноос олгох аж.
Иргэдийн хүүхдийн мөнгө дансанд орсон байвал 502.567 босго онооноос доош буюу одоо бэлнээр авах жагсаалтад багтсан гэсэн үг. Харин хүүхдийн мөнгө нь ороогүй байвал хүүхдийн мөнгөө 2019 оноос авч эхлэх юм байна.
Иргэд, өрхийн амьжиргааны түвшний босго оноогоо мэдэхийн тулд тухайн амьдарч байгаа сум, хорооныхоо нийгмийн халамжийн мэргэжилтэнд очиж хүсэлт гаргасанаар 502.567 босго шугамны хаана нь байгаагаа мэдэх боломжтой юм.
Иргэдийн хувьд хүүхдийн мөнгөнөөс хасагдлаа, хүүхэд маань авахгүй үлдчихвий гэж санах зовох шаардлагаггүй бөгөөд "Хүний хөгжил сангаас хүүхдэд мөнгө олгох” журмын дагуу бүх хүүхэд хүүхдийн мөнгөө авна. Зөвхөн мөнгөө гар дээр авах цаг хугацааны хувьд зохицуулалт хийгдсэн гэдгийг ойлгох нь зүйтэй гэдгийг албаны хүн хэлж байна.
Цаашид хүүхдийн мөнгөний олголттой холбоотой ямар нэг чирэгдэл, бэрхшээл үүсэхгүй бөгөөд аймаг, дүүргүүдэд олголт жигдэрсэн гэдгийг мэдээллээ.
Г.Тэгшсүрэн
Уншиж байна |