С.Зориг агсны хэрэгт холбогдуулан хоёр иргэнийг саатуулан шалгаж байна. Шалгагдаж буй иргэдийн ар гэрийн хүмүүс болох Булган аймгийн уугуул Р.Жавзмаа, Т.Хүрэлбат, Г.Энхбаяр нарын хүмүүс мэдээлэл хийлээ.
Иргэн Р.Жавзмаа “Хүүгийн маань утсанд 2014 оноос эхлэн гэр бүлийг чинь үгүй хийнэ, С.Зоригийн хэрэгт холбогдсоныг чинь илчилнэ гэх үгстэй дарамталсан мессеж ирэх болсон. Судалж үзэхэд манай хажуу хашаанд амьдардаг байсан н.Амгаланбаатар гэдэг залуу бичсэн болж таарсан. Улмаар бид хуулийн байгууллагад хандсан ч хүлээж аваагүй. 2015 оны наймдугаар сарын 31-нд хүүг маань тагнуулын гэмээр хүмүүс баривчлаад 461 дүгээр хорих ангид хорьсон байсан. Хорьсон шалтгаан нь таксины жолоочийг мөчлөн амь насыг нь хөнөөн шоронд хоригдсон н.Амгаланбаатарын хэлснээр С.Зоригийн хэрэгт холбогдуулан шалгаж байгаа гэсэн. Миний хүү хэзээ ч тийм зүйл хийгээгүй. Хилс хэрэг хүлээлгэх гээд байна. Энгийн ногоочин иргэнийг дарамталж байгаад харамсаж байна. Хүү маань ногооны фермер эрхэлдэг байсан. 1998 оны аравдугаар сарын 2-ны өдөр хүү маань аавтайгаа трактор бариад өвс ачаад явж байсан. Хүүг маань хориод нэг жил хоёр сарын хугацаа өнгөрөөд байна. Энэ хугацаанд тагнуулын байгууллага маш сайн жүжиг тоглосон гэж би боддог” хэмээн ярив.
Түүний хүү Б.Содномдаржаагийн хамт Эрдэнэт хотын уугуул Т.Чимгээ гэх иргэнийг сэжигтнээр татжээ. Т.Чимгээгийн ах Т.Хүрэлбат “Манай дүүгийн гар утас руу Амгаланбаатар гэдэг иргэн хоёр жилийн өмнөөс мөн адил дарамталсан мессеж бичдэг байсан. Улмаар 2015 онд Эрдэнэт хотод ажилдаа явах замд нь тагнуулын байгууллагынхан Амгаланбаатар гэгчийн гүтгэлгээр С.Зоригийн хэрэгт холбогдуулан барьж, хорьсон юм билээ. 1998 онд дүүгийн маань бага хүүхэд нь хоёр настай байсан. Тийм байтал гэмт хэрэг үйлдэх гээд явж байсан гэвэл үндэслэлгүй. Тэгэхээр хууль, хяналтын байгууллага энэ хэргийг илрүүлэх биш энгийн иргэнд хэргийг үүрүүлэх гээд байна гэж бид харж байна” хэмээв.
Иргэн Т.Чимгээ, Б.Содномдаржаа нарыг хорих 461 дүгээр ангид саатуулаад байгаа аж.
Г.Тэгшсүрэн