Долоо хоногийн төгсгөлийн гол сэдвүүдийн нэг нь УИХ-ын гишүүн Ж.Батзандангийн АН-аас хөөгдөх тухай байв. Тэрбээр АН-ынхан намайг хөөх гэж байна хэмээн хов зөөж, “Монголоос минь битгий хөөчихөөрэй” хэмээн өмгөөлөл эрэлхийлэв. Бүр намын нөхдөө авлигач, хулгайчаар нь дуудаж, түнжин их л том хагарсан бололтой.
Хэвлэлд өгсөн ярилцлагаас нь харвал тэрбээр Эрдэнэтийн 49 хувийн асуудалд УИХ-ын гишүүн Ц.Нямдоржийг дэмжсэн нь намаасаа хөөгдөх шалтгаан болоод буй гэнэ. Тэр хөөх ажиллагаа их л дээрээс эхлэлтэй гэж. Энэ талаар Ж.Батзандан “Ер нь бол нэгдүгээр хүнээс гаралтай. Баянзүрх дүүргийн намын хорооны дарга бол Ерөнхийлөгчийн хүүгийнх нь найз. Тэндээс Ж.Батзанданг АН-аас хөөх асуудал удаа дараа яригдаж байгаа. Үүний цаана хэн байгаа нь тодорхой. Тагнуул, хуулийн байгууллагаар Ж.Батзанданг дарамтлуулж чимээгүй болгох оролдлогыг Ерөнхийлөгч удаа дараа хийж байгаа” хэмээн ярьжээ.
Ж.Батзандагийн хэлж байгаагаар бол тэр өнөө маргаашгүй АН-аас хөөгдөж, гудамжинд гарахдаа тулаад буй аж. Харин Баянзүрх дүүргийн АН-ын дарга Д.Пүрэвдаваа “Өнгөрсөн 10 дугаарын сарын 30-ны өдөр дүүргийн намын хороо хуралдаж, хяналтын салбар хорооны дүгнэлтийг авч хэлэлцсэн. Энэ хурлаас намын хорооноос зургаан гишүүнийг хассан шийдвэр гаргасан. Ж.Батзанданг дүүргийн намын хорооны гишүүнээс л хассан. Харин анхан шатны намын гишүүнээс, ҮЗХ-ноос хасагдаагүй” гэсэн тайлбарыг хийжээ. Түүнийг дүүргийн намын хорооноос хассанаар намын анхан шатны үүрийг төлөөлж намын хорооны хуралд суух эрхгүй болжээ. Гэхдээ намын гишүүн, Нийслэлийн намын хорооны гишүүн, ҮЗХ-ны гишүүн хэвээр байгаа гэдгийг тодотгосон байна. Дүүргийн намын хорооны энэ шийдвэрт эрхэм гишүүн нэлээн шаралхжээ. Бүр намаас хөөлөө хэмээн “орилж” үзэв.
Үнэхээр АН Ж.Батзанданг намын эсрэг удаа дараа ажилласан хэмээн хөөвөл тэр хаачих вэ? Гудамжинд гарах уу. Төрийн ордонд хоёр парламент дамжин тухалсан тэрбээр эргээд гудамжиндаа очиж, төв талбайгаас тэмцлээ үргэлжлүүлэх үү. Дараагийн С.Ганбаатар болж магадгүй л юм.
Арай өөдрөгөөр харвал Ж.Батзандан нам байгуулах гэж оролдохыг үгүйсгэхгүй. Гэхдээ төдий л хол явахгүй болов уу. Өөр нэг хувилбар нь тэр МАН-ыг бараадах гэж санаархаж болох. Гэхдээ тэр ичих нүүртэй бол МАН руу зүглэхгүй. Үг дуугарах бүртээ МАН-ыг муулдаг түүнд “ах” намыг гэх нэр, нүүр байхгүй.
Ер нь бол АН-аас гарлаа гэхэд түүнийг өнөөгийнхөөс дээр нөхцөл боломж угтахгүй. Тиймээс хувийн тоглолтоо хойш тавьж, намдаа арай найрсагаар хандах нь түүнд өлзийтэй. Улс төрийн хойшдын карьерт нь ч тустай.
В.Бат