Улаанбаатар-Мандалговь чиглэлийн замын Хустайн даваа орчимд баригдсан угтах хаалга нь замын хөдөлгөөнд оролцогчдын аюулгүй байдалд сөргөөр нөлөөлж болзошгүйг зам тээврийн улсын байцаагч нар тогтоожээ. Өөрөөр хэлбэл хөдөлгөөнд оролцогчид зам халтиргаа гулгаатай, үзэгдэх орчинд хязгаарлагдмал үед зам дагуулан барьсан тус хаалгыг мөргөж гэмтэх, амь насаа алдах өндөр эрсдэлтэй байгааг мэргэжлийнхэн хэлсэн гэсэн үг. Осол аваар гарсан тохиолдолд хариуцлагыг хэн үүрэх вэ?. Анхаарал болгоомжгүй явсан гэх нэрээр жолооч л “ял”-аа үүрнэ. Замын зорчих хэсэгт шахуу угтах хаалгаа барьсан компани сугараад өнгөрөх нь гарцаагүй.

Энэ хаалгыг “Электрик ком” гэх компани “Херо” амралт сувиллын газраа зааж зааварчлахын тулд дур мэдэн, замын хөвөөнд барьжээ. Тус хаалгыг Авто замын тухай болох Замын хөдөлгөөний хуулийн хэд хэдэн зүйл заалтыг зөрчиж барьжээ. Улаанбаатар, Мандалговийг чиглэж байгаа зорчигчдын аюулгүй байдалд нөлөөлөхөөс гадна замыг засч сайжруулахад ч саад учруулна. Тиймээс даруй буулгахыг салбарын яамнаас шаардсан байна.

Угтах хаалгын балаг үүгээр дуусахгүй. Аймаг, сум бүр улсын төсвөөс хэдэн сая төгрөг гаргаж, угтаж, үдэх хаалга хийнэ. Шинээр барьж байгуулна, жил бүр засч сайжруулна гэхчлэнгээр төсвөөс хөөрхөн мөнгө цохидог бизнес шахуу ажил байх.

Ирсэн явсныг угтаж үдэж буй нэрээр архиддаг цэг байгуулж байхын оронд замын тэмдэг тэмдэглэгээнд хөрөнгө зарлагадвал илүү үр ашигтай санагдана.

В.Бат