Далай лам маргааш Монголд ирнэ
XIV Далай лам маргааш Монгол Улсад хүрэлцэн ирж, айлчлалаа эхлүүлнэ. Далай ламын айлчлал энэ сарын 18-22-ны хооронд дөрвөн өдөр үргэлжилнэ. Далай лам Их тэнгэрт байрлаж, Соёлын Төв Өргөө, Бөхийн өргөөнд ном айлдана.
Энэ талаар Монголын Бурхан шашны шинэ төвөөс мэдээлэл хийлээ. Монголын бурхны шашны шинэ төвийн тэргүүн, Их хүрээ хийдийн хамба лам З.Санждорж “Далай лам X Богдыг тодруулах ажлыг гардан зохион байгуулахаар ирж байна. XIV Далай лам манай улсын дотоод хэрэгт хөндлөнгөөс оролцож, 20-иод хутагт, хувилгаадыг тодруулсан. Гэтэл манай хуулинд хутагт, хувилгаадыг тодруулахыг хориглосон байдаг.
Шарын шашны тэргүүн, анхны Богд Өндөр Гэгээн Занабазарын ес дэх дүрээр Монголоос хэн ч хүсээгүй байхад өөрийнхөө хамаатныг өргөмжилсөн. Энэ хүнийг 60 жилийн дараа тодруулсан. Харин одоо тэр Богдынхоо хойд дүрийг тодруулахаар Монгол оронд ирэх гэж байгаад би хувь хүнийхээ хувьд зөвшөөрөхгүй байна. Яагаад гэвэл, нэгдүгээрт би Монгол хүн. Монголын төлөө гэсэн цохилох зүрхтэй учраас үүнийг хэлэх хэрэгтэй болоод байна. Хоёрдугаарт, урд, хойд хоёр хөрш хоёулаа зөвшөөрөхгүй байгаа. Улс төрийн нөхцөл байдал ийм байхад мухар сүсэг, нэг хүнийг тахин шүтэх үзэлдээ автагдаж, XIV Далай ламыг залах гэж байгаа нь миний хувьд туйлын харамсалтай байна” хэмээн Далай ламын айлчлалыг эсэргүүцэж буйгаа илэрхийлэв.
В.Бат