УИХ-ын чуулганы нэгдсэн хуралдаанаар Элчин сайдуудыг томилох асуудлыг хэлэлцэж байна. Хэлэлцэж байгаа асуудалтай холбогдуулан гишүүд үг хэлсэн юм. Гишүүдийн олонхи нь Элчин сайдад нэр дэвшигчдийг дэмжиж байсан. Харин гишүүн Ц.Даваасүрэн, Х.Болорчулуун нар Элчин сайдад нэр дэвшигчдээс Ерөнхий сайдаар ажиллаж байсан С.Баяр, М.Энхсайхан нарыг дэмжихгүй байгаагаа илэрхийлж байлаа. Тэр дундаа Ерөнхий сайд асан С.Баярыг Оюутолгой гэрээг хийсэнд шүүмжлэлтэй хандаж байв. Үүнтэй холбогдуулан Монгол Улсаас Их Британи, Умард Ирландын Нэгдсэн Вант Улсад суух Онц бөгөөд Бүрэн эрхт Элчин сайдаар нэр дэвшигч Санжаагийн Баяр тайлбар хийсэн юм. Тэрбээр:
-УИХ-ын энэ танхимд УИХ-ын гишүүн, Ерөнхий сайдын хувьд үг хэлэх бололцоо олдож байлаа. Томилогдож очих газартаа юу хийх талаар төлөвлөгөө надад бүрэн боловсрогдоогүй байна. Миний хувьд энэ талаар бодож байгаа. Гэхдээ УИХ-ын гишүүдийн хэлж байгаа үгтэй холбогдуулан тайлбар хийх хэрэгтэй байх. Оюутолгойн гэрээг би Ерөнхий сайдын хувьд байгуулах нь зүйтэй гэж зүтгүүлсээр байгаад байгуулсан. Би үүгээрээ бахархдаг. Өнөөдөр эдийн засаг хүнд байгаа. 40 жилийн өмнө байгуулсан Эрдэнэт, 4 жилийн өмнө байгуулсан “Оюутолгой” хоёр эдийн засгийг авч явж байна. Оюутолгойн үйл ажиллагааг эхлүүлсэн цагаас хойш 8.1 их наяд төгрөгийн төсөв хуримтлуулсан байгаа. Гэрээг сайжруулахын тухайд төр, засгийн эрх барьж байгаа улс төрийн хүчин мэдэх асуудал хэмээлээ.
Н.Энх