УИХ-ын чуулганы нэгдсэн хуралдаанаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай хуулийн төслийн хэлэлцэхийг дэмжлээ.  Энэ хуулийн төслөөр Анхдугаар  Үндсэн хууль батлагдсан өдрийг тэмдэглэлт өдөр болгон бүх нийтээр амрахаар болж байгаа. Тодруулбал,  энэ сарын 26-ны өдөр буюу  “Тусгаар тогтнолын өдөр” –ийг сэргээж байгаа юм. Хэлэлцэж байгаа асуудалтай холбогдуулан  гишүүд үг хэллээ.

УИХ-ын гишүүн С.Жавхлан:

-Түмэн олон нэг өдөр яаж баярлах вэ биш яаж нэг өдөр ажилтай байх вэ гэж бодоцгоож байна. Өнөөдөр нийгэмд дэндүү бухимдал төрүүлнэ. Уг нь баярлах, бахархах, омогших, уриалах нэг өөр. Та бүхэн Сүхбаатарын хөшөөнд цэцэг өргөөд орхино. Гэтэл иргэд ажиллах хэрэгтэй байна.

УИХ-ын гишүүн С.Эрдэнэ:

-Манай Ардчилсан намын дотоод хэрэгт МАН-ынхан ямар ч их санаа тавьдаг юм. Өнөөдөр олонхи болж, төрийн эрх барьж байгаа хүчний чинь хувьд бид асуудал тавьж байгаа. Цөөнхийн бүлгээс удаа дараа сануулж байгаа. Хэрвээ бидний сануулга багадаад байгаа бол дараагийн алхамдаа орно. Үндсэн хуулийн үзэл баримтлал, үг үсгийг ёсчлон дагадаг бай. Үндсэн хуулиа уландаа гишгэчихээд энэ өдрийг тэмдэглэнэ гэдгийг чинь гайхаж байна. Өнөөдөр бид эрх барьж байгаа олонхиос  эдийн засаг хүндэрч байгааг, ам.долларын ханш өсч байгааг асууна. Парламентын соёлтой зарчим руу хамтарч ажиллах хэрэгтэй. Танай Монгол банкны Ерөнхийлөгч валютын сангийн нөөцийг  зарласны гай, Сангийн сайдын буруу үйлдлээс ам.долларын ханш өсч байгаа.

Ийнхүү гишүүд үг хэлсний дараа санал хураалт явууллаа. Гишүүдийн олонхийн саналаар Нийтээр тэмдэглэх баярын болон тэмдэглэлт өдрүүдийн тухай хуульд нэмэлт, өөрчлөлт оруулах тухай хуулийн төслийн хэлэлцэх нь зүйтэй гэж үзсэн юм.

Ийнхүү хуулийг анхны хэлэлцүүлэгт бэлтгүүлэхээр Төрийн байгуулалтын байнгын хороонд шилжүүллээ.

Н.Энх