УИХ-ын чуулганы нэгдсэн хуралдаанаар Монгол Улс байнга төвийг сахих тухай хуулийн төслийн хэлэлцэх эсэхийг шийдэв. Монгол Улсын Ерөнхийлөгчийн санаалчилсан энэ хуулийн төслийг өмнөх парламентын үед  хэлэлцэхийг дэмжсэн ч батлагдаагүй юм.  Монгол Улс байнга төвийг сахих тухай хуулийн төслийг Аюулгүй байдал, гадаад бодлогын байнгын хорооны хуралдаанаар хэлэлцээд, хууль санаачлагачид нь буцаах нь зүйтэй гэсэн дүгнэлт гаргажээ.

Хэлэлцэж байгаа асуудалтай холбогдуулан гишүүн Н.Оюундарь “Монгол Улс байнга төвийг сахих нь  тогтворгүй байдал үүсгэх магадлалтай гэж би хардаг. Манай улсын хувьд хоёр хөрштэйгээ энэ харьцаанд шилжих нөхцөл бүрдсэн үү. Энэ нь цагаа олсон шийдвэр мөн үү. Эхний ээлжинд энэ хуулийн төслийг татаж авах нь зүйтэй гэж бодож байна гэлээ.

Ийнхүү байнгын хорооны дүгнэлтээр Монгол Улс байнга төвийг сахих тухай хуулийн төслийг буцаан татах санал хураалт явуулав.   Хуралдаанд оролцсон гишүүдийн олонхийн саналаар уг хуулийн төслийг хууль санаачлагачид нь буцаалаа.

Дараагаар нь Монгол Улсын иргэний харьяаллын тухай хуулийн шинэчилсэн найруулгын төслийг хэлэлцэх эсэхийг шийдлээ. Уг хуулийн төслийг мөн Ерөнхийлөгчөөс санаачлан өргөн барьсан юм. Гэвч гишүүд уг хуулийн төслийг хэлэлцэх боломжгүй гэж үзэн хууль санаачлагчид нь буцаав. Ийнхүү Ерөнхийлөгчөөс өргөн барьсан 2 хуулийн төслийг хууль санаачлагчид нь буцааснаар өнөөдрийн чуулганы хуралдаан өндөрлөлөө

Н.Энх