Ерөнхий сайд асан Н.Алтанхуягийг АТГ-аас дуудаж, мэдүүлэг өгөхийг шаардсан билээ. Энэ дагуу Н.Алтанхуяг АТГ-т очлоо. Тэрбээр АТГ руу орохын өмнө сэтгүүлчдэд мэдээлэл өгсөн юм.
Н.Алтанхуяг: Өнөөдөр 14 цагийн үед надад зарлан дуудах хуудас ирлээ. Тэгээд би ирж байна. Ерөнхийлөгчид нэр дэвшинэ гээд хэлцэн чинь нэлээн их үйл явдал өрнөх бололтой. Цөөхөн хэдэн хүмүүс Монголын хамаг баялгийг сорчилж завшаад байна гээд хэлцэн чинь Ц.Элбэгдорж, түүний бүлэглэл, амь тавьж байгаа бололтой. Цөөхөн хоногт гурав, дөрвөн эмэгтэйг шоронд хийлээ.
Хууль, хяналтын байгууллага дотор манай Ерөнхийлөгч, түүний бүлэглэлийн бий болгосон хонгил байдаг гэж би хэлж байсан. Тэр хонгил руугаа намайг шахаж оруулах гэж олон жил оролдож байгаа. Ерөнхий сайд байх үеэс эхлээд л зохиомол, худал хэрэг үүсгэсэн. Сая манай ойр хавийн хүмүүсийг барьж, тэдэнтэй холбогдуулж, намайг зохиомол хэрэг рүү оруулж байна. Энд айж, ичээд байх зүйлгүй. Үнэн хэзээд ялна.
Хоёр зүйлд харамсаж байна. Намайг эртхэн дуудаж авчраад асуучихгүй. Гансүхээс эхлээд Мөнгөнтуяа хүртэл олон хүнийг шорон гянданд тарчилгаж, хамгийн сүүлд нь төрсөн дүү, хамаатнуудыг хорилоо. Намайг тэр шорондоо хийгээд тэр хүмүүсийг гаргах цаг нь болсон.
Хоёрт, Ц.Элбэгдорж бид нар 1990 оноос эхэлж, ардчиллын төлөө явсан. Ц.Элбэгдоржийн үгэнд заавал орох ёстой, үгэнд нь орохгүй бол шоронд ордог ардчиллын төлөө би яваагүй. Ийм хоёрхон сонголттой ардчилал Монголд байж болохгүй. Шоронд хийсэн ч бууж өгөхгүй, тэмцэнэ.
В.Бат