“Монгол” телевизээс хоёр дахь жилдээ зохион байгуулсан “Авьяаслаг Монголчууд” шоу нэвтрүүлэг өчигдөр дуусч, шилдгээ тодрууллаа. Тус нэвтрүүлгийн хоёрдугаар улирлын ялагчаар каунтри дуучин О.Энх-Эрдэнэ шалгарав.

О.Энх-Эрдэнэд “Авьяаслаг Монголчууд” шоунд оролцох саналыг түүний ах тавьсан гэдэг. Тэрбээр өөрийгөө 100 сая төгрөгийн эзэн болно гэж төсөөлөө ч үгүй аж. Мөн уг шоу нэвтрүүлэг  түүний хамгийн анхны том хэмжээний тайз, том сорилт байжээ. Тэрбээр 3-4 жилийн өмнөөс жазз, каунтри төрлөөр дуулж эхэлсэн бөгөөд Фрэнк Синатра шиг дэлхийн хэмжээний дуучин болохыг мөрөөддөг тухайгаа дурссан байна. Боломж олдвол олон улсад өөрийгөө сорих бодолтойгоо мөн хуучилжээ.

Тэрбээр багаасаа дуулах сонирхолтой байсан хэдий ч өдгөө ШУТИС-д Уул уурхайн цахилгаан тоног төхөөрөмжийн ашиглалтын инженер мэргэжлээр суралцдаг байна. Энэ мэргэжлийг сонгосон тухайгаа “Дуугаа орхиод өөр мэргэжил сонгоход хэцүү байгаагүй. Багаасаа физикийн хичээлд дуртай, инженер болохыг мөрөөдсөн. Эрдэнэтийн хүүхдүүд ихэвчлэн энэ мэргэжлийг сонгодог. Би ч бас тэдний нэг” хэмээсэн байна.

Ялагч болсон даруйдаа “Маш их баярлалаа. Та бүхнийхээ итгэлийг алдахгүй сайн дуучин бас сайн дуулагч байхын тулд байдаг чадлаараа хичээх болно. Амьдралын минь хамгийн сайхан бас хамгийн том мэдрэмжийг өгсөн, намайг дэмжсэн бүх хүмүүст сэтгэлийн угаас таларахаж байна” хэмээн сэтгэгдлээ хуваалцав.

О.Энх-Эрдэнэ эхний шатанд АНУ-ын каунтри дуучин Жорж Стрейтийн "Amarillo By Morning" дууг дуулж, тэнцсэн. Энэ талаар Америкийн урлагийн http://countryfancast.com/  сайтад http://countryfancast.com/mongolias-got-talent-george-strait-cover/ онцлон бичиж байсан. Уг мэдээний доор олон нийт “Бүх ноотыг нь яг л George Strait шиг төгс дуулжээ. Биширмээр авъяастай залуу юм” хэмээн сэтгэгдлээ хуваалцжээ.

Г.Тэгшсүрэн