С.Зориг агсныг хөнөөсөн хэргийн шүүх хурал таван өдөр үргэлжилж, өнөөдөр шийдвэрээ гаргалаа. Шүүхээс шүүгдэгч Ц.Амгаланбаатар, Т.Чимгээ, Б.Содномдаржаа нарт 24-25 жилийн ял оноосон юм.
Энэ талаар УИХ-ын гишүүн Ц.Нямдорж өөрийн байр суурийг илэрхийлсэн байна. Тэрбээр "Хүн амины хэрэг үйлдсэнийг нь үнэхээр тогтоосон юм бол нээлттэй хурал хийх ёстой. Энэ дуулиантай хэргийг яагаад олны нүднээс далд аваачиж, шийдэж байна аа. Бүр гайхаш төрүүлээд байгаа нь Булган гэдэг эмэгтэйг бүтэн жил хорьчихоод одоо гэрч ч биш, сэжигтэн ч биш, хохирогч биш, холбогдогч биш болсон. Ингэж болдог юм уу. Тэр хүнийг жил хорих эрхийг шүүгч л өгсөн. 37 онд ингэж хэрэг тасалдаг байсан байх шүү. Арай дэндэж байгаа юм биш үү" хэмээн энэ асуудалд Дээд шүүхийг анхааралдаа авахыг шаардлаа.
Мөн тэрбээр "хэлмэгдүүлэлт хийснээ нуух гэж л хаалттай хуралдаан хийгээд байгаа юм шиг харагдаж байна. Энэ асуудал дээр Хуульзүйн байнгын хороо чимээ өнгөрч болохгүй. Захиалгаар хэрэг шийддэг, аюултай юм болж байна" гэв.
В.Бат