УИХ-ын чуулганы нэгдсэн хуралдаанаар Улсын Ерөнхий прокурорын орлогчоор Б.Амгаланбаатарыг томилох асуудлыг хэлэлцэж дэмжлээ. Хэлэлцэж байгаа асуудалтай холбогдуулан гишүүд үг хэлж, захиас өгч байсан юм. Тухайлбал УИХ-ын гишүүн Ц.Нямдорж:
-Би Амгаланбаатарыг дэмжиж байна. Би хуулийн байгууллагатай зууралдсанаас хойш 7 Ерөнхий шүүгчийн нүүр үзсэн. Хотын прокурорын асуудлыг та нар шийдэх байх. Прокурор хүн тавьж үзээрэй. Би прокурорын унаган боловсон хүчин. Гаднаас хүн тавих гэхээр прокурорууд ажилдаа сэтгэлгүй болоод байдаг юм. Дуулиан шуугиантай хэргүүдийг та нар шалгаж чадахгүй байдал руу яваад байна. Мөнгө ихтэй, өндөр албан тушаалтнууд руу гар чинь явж чадахгүй байна. "Эрдэнэт"-ийн 49 хувийг төрийн мөнгөний эх үүсвэрүүдээс авчихсан юм билээ шүү дээ. Өмнөговийн ирээдүйд баригдах цахилгаан станцыг барьцаанд тавьчихсан, 2012 онд сургууль төгссөн нусаа хацартаа наасан хүүхдэд юуных нь 112 тэрбум төгрөг байх вэ дээ. Та нар ажлаа хийж чадахгүй бол ард түмний хүлээс тайлагдана шүү. Илүүдээ гарсан мөнгө улсад байгаа бол надад өгчих.
С.Зориг агсны амь насыг бүрэлгэсэн давж заалдах шатны шүүх хурлыг нээлттэй хийгээрэй. Хүн алчихсан хүний хэргийг нууцалж байгаад тасалдаг нь ямар учиртай юм. Яагаад тагнуулын байгууллагын ажилтан шинжээчийн дүгнэлт гаргадаг юм. Би та нарыг хэлсэн хэлээгүй гадарлана шүү. Хэргийн өнгө танина гэж байдаг юм. Цорын ганц хүн хажууд нь байхад яагаад шүүх хуралд оруулдаггүй юм. Булганыг жил хорьсоны хариуцлагыг хэн хүлээх юм. Булганыг эс оруулсан шүүх хурлыг юу гэх юм хэмээсэн.
Гишүүд С.Зориг агсны шүүх хурлыг хаалттай явуулж, нийгэмд эргэлзээ төрүүлсэнд шүүмжлэлтэй хандаж байгаа юм.
Н.Энх
Уншиж байна |