Баян-Өлгий аймгийн Ардчилсан намынхан ордонтой болохоор шийджээ. Өлгий хотод баригдах “Ардчиллын Ордон”-ы зураг бэлэн болж, ирэх гуравдугаар сараас барилгын ажлыг эхлүүлэхээр болжээ.
Долоон давхар ордны нийт төсөв нь тэрбум гаруй төгрөг байх гэнэ. Санхүүжилтийг ард түмний хандив болон ардчиллыг дэмжигч байгууллагуудын тусламжаар босгоно гэдгийг Баян-Өлгий аймгийн Ардчилсан намын дарга Е.Зангар хэлж байна.
“Ардчиллын Ордон”-ы нэг, хоёрдугаар давхарт нь Баян-Өлгий аймгийн Ардчилсан нам үйл ажиллагаа явуулна. Харин үлдсэн давхруудад санхүүжилт гаргасан байгууллагууд байрлах аж. Одоогоор гүйцэтгэгч тодроогүй бөгөөд зураг төслийн дагуу барьж өгөх саналыг барилгын хэд хэдэн компани тавиад буй аж.
Удахгүй “Ардчиллын Ордон”-ы хөрөнгө мөнгийг бүрдүүлэх аяныг өрнүүлэх юм байна. Одоогоор Баян-Өлгий аймгийн ИТХ дахь АН-ын бүлгийн дарга Буланы Бейсен “Ардчиллын Ордон”-ы макетыг 10 сая төгрөгөөр худалдан авч, анхны хандивыг өргөөд буй юм байна. Мөн З.Энхболдоос эхлээд АН-ын лидерүүд, гишүүд, дэмжигчид нь “Ардчиллын Ордон” барихад тусалж дэмжинэ гэдгээ илэрхийлжээ.
Дашрамд дуулгахад Баян-Өлгийн Ардчилсан нам 15 000 гаруй гишүүд дэмжигчтэй юм байна.
В.Бат