УИХ-ын чуулганы нэгдсэн хуралдаанаар Ерөнхийлөгчийн сонгуулийн тухай хуулийг хэлэлцэж байна. Хэлэлцэж байгаа асуудалтай холбогдуулан гишүүд асуулт тавьж хариулт авч байгаа юм. Ерөнхийлөгчийн сонгуулийн хуулийн төсөлд сурталчилгааны хугацааг 22 хоног болгожээ. Ерөнхийлөгчийн сонгуулийн үр дүнг дэлгэцээр дамжуулах юм байна. Цөөн нэр дэвшигч байх учир намын нэр, нэр дэвшигчийг тод харуулна гэдгийг СЕХ-ны дарга Ч.Содномдорж онцолсон. УИХ-ын гишүүн С.Жавхлан:
-Сүүлийн 5-аас доошгүй эх орондоо байнга суусан байх гэдэгт гэж “сонгуулийн санал авах өдрөөс тоолоход 6 сарын хугацаан гадаадад байнга суугаагүй байх” гэж онцолжээ. . Үүнийг Монгол Улсын 3 дахь Ерөнхийлөгч Н.Энхбаярт зориулсан байх. Надад зориулсан хууль бас байна. Нам, эвслээс УИХ-ын сонгуульд нэр дэвшин сонгогдсон гишүүнийг УИХ-ын гишүүнтэй намыг УИХ-д суудалтай нам гэж хэлнэ гэсэн байна. Намайг Ерөнхийлөгчийн сонгуулиас хассан байна. Үүнийг би түмэн олонтойгоо хамт эсэргүүцнэ. Одоо гадаа 45 нас хүрсэн хүнийг ажилд авахаа больчихоод байгаа. Гэтэл төрийн тэргүүн 45 наснаас эхэлж дэвшүүлж байна. Төрийн тэргүүн өөрөө нам бус байдаг. Тиймээс УИХ-д суудалтай намаас Ерөнхийлөгчид нэр дэвшүүлнэ гэж яагаад оруулсан бэ?
Төрийн байгуулалтын байнгын хорооны дарга Н.Энхболд:
-Монгол Улсын Үндсэн хуульд таны хэлсэн бүхнийг заасан байдаг. Хэрвээ та өөрчлөлт оруулах гэж байгаа бол хуулийн төсөл санаачилж болно. Үндсэн хуулинд Ерөнхийлөгчид нэр дэвшигч нь 45 настай, сүүлийн 5 жил эх орондоо суусан хүн гэж заасан байдаг. Бид үүнийг нь тодотгож өгөөд сүүлийн 6 жил гадаадад амьдраагүй байх гэж зааж өгсөн. Мөн өмнөх хуулиудад УИХ-д суудал бүхий нам гэдгийг тодорхойлоогүй байсан. УИХ-д сонгогдсоны дараа сонгогчдын итгэлийг алдсан тохиолдол гарч байлаа. Тиймээс тухайн нам, эвслээс сонгогдсон гишүүнтэй намыг УИХ-д суудалтай нам гэж хэлнэ гэж тодотгосон. Таны хувьд бие даан нэр дэвшин сонгогдсон. Аль нэг нам эвсэлд орохгүй юм байна гэж сонгогчид ойлгож, таны төлөө саналаа өгсөн байж таараа. Наад зах нь Монгол Улсын Ерөнхийлөгчид нэр дэвшихгүй юм байна гэж үзэн танд саналаа өгсөн гэж ойлгож байгаа хэмээн хариулсан юм.
УИХ-ын гишүүн О.Баасанхүү:
-Би энэ хуулийн төслийг дэмжихгүй байна. Энэ бол МАН-д зориулсан хууль. 6 сар гадаадад оршин суугаагүй байх гэсэн заалтыг Д.Тэрбишдагва гишүүн санал гарган оруулсан юм билээ. Та нар Н.Энхбаярыг нэр дэвших вий гэж бодоод заалтаа оруулсан. Та нар одоо Н.Энхбаяртай ноцолдохоо боль. 3 сая иргэний дундаас намыг биш ард түмнийг төлөөлөх хүнийг гаргаж ирэх хэрэгтэй. Парламентад суудалгүй нам зөвхөн аль нэг намыг дэмжих юм билээ. Ажлын хэсэгт намайг орсон гэж байна. Эсвэл тэгш харьцаатай болго.
Чуулганы хуралдаан үргэлжилж байна.
Н.Энх