АНУ-д өнгөрсөн оны арваннэгдүгээр сард зохион байгуулагдсан Ерөнхийлөгчийн сонгуулийн эцсийн дүнг Оросын хакерууд өөрчилж, америкчуудын сонголтыг үл хүндэтгэсэн хэмээн тус улсын Холбооны мөрдөх товчоо /FBI/ өмнө нь мэдээлж, уг асуудлаар тусгай мөрдлөгө явуулсан билээ. ОХУ-ын Засгийн газрын хүсэлтийн дагуу тусгай бэлтгэгдсэн хакерууд кибер халдлага үйлдсэн хэмээн АНУ-ын Тагнуулын Ерөнхий газрын дарга Жамес Клаппер мэдэгдсэн юм.
Тэрбээр өмнө нь бид баталгаатай нотолгоо олсон хэмээн мэдэгдэж байсан ч өнөөг хүртэл энэ баримтаа дэлгэхгүй байгаа. Оросуудын дэмжлэгтэй ялалт байгуулсан гэх Трамп, Жамес Клапперийг баримтаа дэлгэхийг шаардсаар байна. Гэхдээ өнгөрөгч долоо хоногт Цагаан ордны хэвлэлийн төлөөлөгч Жош Эрнест оросууд үнэхээр сонгуулийн дүнд нөлөөлсөн эсэхийг баталж чадаагүй гээд “Тэд сайтар бэлтгэгдсэн байсан” хэмээн мэдэгджээ. Мөн Холбооны мөрдөх товчоо, Үндэсний аюулгүй байдлын агентлагийн удирдлагууд ч АНУ-ын Ерөнхийлөгчийн сонгуулийн дүнд оросууд нөлөөлсөн гэх нотолгоо олдоогүй хэмээн мэдэгдсэн ч “Оросуудыг хэн нэгэн хамгаалаад байна” гэв. Энэхүү кибер халдлагыг ОХУ-ын Ерөнхийлөгч В.Путин санаачилж, АНУ-ын Ерөнхийлөгчийн сонгуульд эрх баригч Ардчилсан намаас нэр дэвшсэн Хилари Клинтоны сонгуулийн багийн компьютер дэх мэдээллийг хакердах нууц ажиллагааг Путин болон түүний багийн нөхөд удирдан явуулсан” гэх баталгаагүй дүгнэлийг АНУ-ын Тагнуулын Ерөнхий газар гаргасан билээ.
Уг мэдэгдлийг дараахан Кремлийн хэвлэлийн төлөөлөгч Дмитрий Песков “АНУ-ын Тагнуулын Ерөнхий газраас гаргасан дээрх дүгнэлтийг “ор үндэслэлгүй” хэмээн мэдэгдэж байв. Тэд баталаагүй дүгнэлт гаргаж, улмаар нийгэмд Оросын талаар сөрөг мэдээлэл цацаж байна. Оросыг кибер халдлагатай холбоотой гэх ганц ч баримт байхгүй мөртлөө энэхүү хэрэгтэй биднийг холбон ярьж буйд харамсч байна” гэж мэдэгджээ. Мөн В.Путин “Утгагүй хэрэгт гүтгэж байгаа нь хоёр улсын харилцааг улам сэвтүүлж байна” гэв. Украины зүүн хязгаарын асуудал, Сирийн асуудлаас болж хоёр улсын харилцаа өдрөөс өдөрт дордож буй юм.
Энэхүү мэдэгдлийн дараа АНУ-ын Ерөнхийлөгчөөр сонгогдоод буй Дональд Трамп “Хэн тэднийг хамгаалаад байгаа юм. Хэрвээ хакерууд сонгуулийн дүнд нөлөөлсөн бол тэд бус та бүхэн хариуцлага хүлээх ёстой. Учир нь та нар кибер халдлагаас урьдчилсан сэргийлж чадаагүй болно” гэж мэдэгджээ.
Оросуудыг сонгуулийн дүнг хакердсан гэх баталгаатай мэдээлэл олоогүй мөртлөө америкчууд хориг тавихаар төлөвлөж байгаад Москва дургүйцлээ илэрхийлэв. Учир нь Ардчилсан намаас сонгогдсон сенатчид болох Жон Маккейн, Линдси Грэм, Робертт Портман, Бен Кардин болон Боб Менендес өчигдөр хамтарсан мэдэгдэл хийх үеэрээ “Оросууд сонгуулийн дүнд нөлөөлсөн хэмээн бид үзэж байна. Тиймээс тус улсын байгалийн хий, газрын тосны салбарт Вашингтон хориг тавих тухай хуулийн төслийг боловсруулсан” гэж хэллээ. Тус хуулийн төсөлд “АНУ-ын эдийн засаг, гадаад бодлого, үндэсний аюулгүй байдалд заналхийлсэн, кибер халдлага зохион байгуулж сонгуулийн дүнг өөрчилсөн хэрэгтэй холбоотой дотоод болон гадаадын бүх иргэдийн эсрэг хатуу хориг тавих хэрэгтэй. Мөн хөрөнгийг нь царцаах. Мөн тэдэнд виз олгохгүй байх хэрэгтэй” хэмээн тусгасан байна.
Москва байгалийн хий, газрын тосны салбараас асар их хэмжээний ашиг олдог юм.
Мөн АНУ-ын 44 дэх Ерөнхийлөгч Барак Обама өчигдөр бүрэн эрхийнхээ хугацаан дахь сүүлчийн мэдэгдлээ ард түмэндээ хандан хийсэн билээ. Тэрбээр “Америк бол агуу гүрэн. Тиймээс ирэх он жилүүдэд энэ статусаа алдах учиргүй. Ямар ч улс бидний дотоод асуудалд хөндлөнгөөс оролцох ёсгүй. Тиймээс хүчирхэг эх орноо харийн дайснаас бүх талаараа хамгаалах болно” гэж мэдэгджээ.
Б.Дэлгэрцэцэг