“Эрдэнэт”-ийн 49 хувийг худалдсантай холбоотой ажлын хэсгийн шалгалтын дүнгийн талаар мэдээлэл хийлээ. Ажлын хэсгийн ахлагч Ш.Раднаасэд:
-Ажлын хэсэг санал дүгнэлтээ гаргаж дууслаа. Ажлын хэсэг хүчин төгөлдөр байсан хууль тогтоомжийн хүрээнд худалдан авах ажиллагаа явагдаагүй. Хууль зөрчсөн гэдэг дүгнэлт гаргалаа. Үндсэн хуулиас эхлээд олон улсын гэрээний, Төрийн өмчийн тухай, Компанийн тухай хууль болон УИХ-ын тогтоолыг зөрчсөн гэж дүгнэж байна. УИХ дангаар шийдвэрлэх асуудлыг Засгийн газар шийдсэн нь буруу хэмээн мэдээллээ. Мэдээллийн дараагаар нь гишүүн Ц.Нямдоржид хандан “Таны хүүхэд “Эрдэнэт” үйлдвэрт шахаа хийсэн юм билээ. Энэ талаар та ямар тайлбар хийх вэ? Хүүхэд нь шахаа хийсэн байхад та ажлын хэсэг багтсан нь зөв үү” гэсэн сэтгүүлчийн асуултад тэрбээр:
-2004, 2006 онд нэг удаа миний хүүхэд гэрээ хийсэн юм билээ. Ном журмын дагуу тэр ажлуудаа хийгээд больсон. Үүнийг нуугаад байх зүйл байхгүй.
Миний хүүхэд "Эрдэнэт" рүү гэрээ хийхээр явахад би таньдаг хүнээсээ "хууль номын дагуу хийгээд өгөөч" гэж гуйсан юм. Хүүхэд нь юм хийх гэж байхад хэн ч гэсэн таньдаг хүндээ хэлдэг.
С.Эрдэнэ гишүүн “Ц.Нямдорж шахаа хийх гэж байна" гэсэн гүтгэлэг явуулаад байгаа. Нуугаад байх зүйлгүй хэмээлээ.
Н.Энх