Хойд Солонгос улсаас Их Британи улсад суугаа бүрэн эрхт Элчин сайдын нэгдүгээр орлогч  Тае Ён Хо өнгөрсөн оны наймдугаар сард Өмнөд Солонгос руу гэр бүлийнхээ хамт зугтаасан билээ. Пхеньян өнөөг хүртэл улсаасаа урвасан дипломатчийг хүлээлгэн өгөхийг Сөүлийн талаас шаардсаар байна.

Тае Ён Хо Британийн “ВВС” агентлагт ярилцлага өгч, Хойд Солонгосын цөмийн хүч чадал ямар түвшинд явж буйг ярьжээ.  Тэрбээр “Удирдагч Ким Чен Ун ганцхан товчлуур дарахад АНУ-ын Нью Йорк хотноо байрлах НҮБ-ын байр үгүй болно” гэж ярьсан талаар “www.dailymail.co.uk” сайт мэдээллээ.

“Хойд Солонгосын цөмийн зэвсгийн сүр хүч өдрөөс өдөр хүчирхэг болж байгаа. Ким Чен Ун удахгүй хүчээ олон улсад гайхуулах болно” хэмээн дипломатч ярьжээ.

Тус улс өнгөрсөн онд хоёр удаа цөмийн туршилт хийж, хэд хэдэн удаа алсын болон ойрын пуужин туршиж, хөрс орнуудаа заналхийлсэн билээ. Уг үйл явдлын дараа НҮБ, тус улсын эсрэг хамгийн хатуу хоригийг тавьж, тусламж үзүүлэхээ зогсоохоос гадна тус улсад цөмийн зэвсэг, пуужин үйлдвэрлэхэд хэрэгтэй бүтээгдэхүүнийг нийлүүлэхийг олон улсад хориглосон юм.

Б.Дэлгэрцэцэг