Энэтхэгт олон хүний аминд хүрсэн барыг устгасан талаар “www.dailymail.co.uk” сайт мэдээллээ. Сүүлийн хэдэн сард хойд хэсгийн Уттар Прадеш мужид иргэд барын дайралтад өртөж, амь нас болон эрүүл мэндээрээ хохирох нь ихэссэн байна. Дөрөвхөн сарын дотор 19 хүн барын дайралтад өртөж, зургаан хүн харамсалтайгаар амиа алджээ.

Тэгвэл тус мужийн нэгэн залуу алуурчин барыг хэд хэдэн удаа буудаж устгасан байна. Залуугийн аав уг барын дайралтын улмаас амиа алдсан гэнэ. Энэтхэгийн ойд амьдарч буй араатан амьтнууд сүүлийн жилүүдэд хот сууринд нэвтэрч, иргэдийг айлган сүрдүүлэх болсон юм. Амьтны эрхийг хамгаалагчид “Араатан амьтад өлсөхийн эрхэнд хот суурин руу орж байна” гэж мэдээлжээ.

Энэтхэгт өнгөрсөн 2015 онд 11 хүн бар, ирвэсний дайралтад өртөж, амиа алдсан байна.

Б.Дэлгэрцэцэг