Төр, нийгмийн нэрт зүтгэлтэн С.Зориг агсныг хөнөөсөн хэргийн шүүх хурал 18 жилийн дараа болж, хэрэгтнүүдийг ялласан. Хохирогч болоод шүүдэгчдийн зүгээс шүүх хурлыг нээлттэй явуулах хүсэлтийг удаа дараа тавьсан ч улсын нууцад хамаарах материал дэлгэгдэх учраас хаалттай явуулах шийдвэрийг прокурорын байгууллагаас гаргасан юм. Анхан болон давж заалдах шатны шүүх хурлууд хаалттай явагдаж, олон нийтийн дунд эргэлзээтэй олон асуулт үлдсэн.

Тэгвэл С.Зоригийг хөнөөсөн хэрэгтэй холбоотой зарим материалыг төрийн нууцаас гаргасныг прокурорын байгууллагаас МҮОНТ-ээр дамжуулан зарлаж, дүрс бичлэгүүдийг цацлаа.

Ерөнхийлөгч Ц.Элбэгдоржийн гарын үсэгтэй, ТЕГ-ын дарга Б.Хурцад хаягласан албан бичигт “С.Зоригийн амь насыг хөнөөсөн Т.Чимгээ, Б.Содномдаржаа, Ц.Амгаланбаатар нар холбогдох хэрэгт авагдсан баримт бичигт агуулагдаж буй төрийн нууцыг хуульд заасан хүрээнд ил болгохыг зөвшөөрөв” хэмээжээ.

Энэ хүрээнд нийслэлийн Прокурорын газрын Хэрэг бүртгэх, мөрдөн байцаах ажиллагаанд хяналт тавих хэлстийн дарга Ж.Сандагсүрэн олон нийтэд мэдээлэл өглөө. Тэрбээр “Мөрдөн байцаалтын ажиллагаагаар тогтоогдсоноор дөрвөн хүн С.Зориг агсныг хөнөөсөн хэрэгт гүйцэтгэгчээр оролцсон гэж тогтоосон. Тэдний нэг нь Амгаланбаатар, Содномдаржаа нарын гарт амь насаа алдсан нь мөн нотлогдсон” гэсэн мэдээллийг өгөв. Мөн тэрбээр Булган яагаад шүүх хуралд гэрчээр оролцсонгүй вэ гэх сэтгүүлчийн асуултад “Тухайн үйл явдлыг нүдээрээ харсан хүний хувьд гэрч мөн. Гэхдээ бидний дагаж мөрдөж байгаа байцаан шийтгэх хуулийн 45 дугаар зүйлд гэрч гэж тухайн хэрэгт холбогдолгүй, хэргийн талаар үнэн зөв мэдэж байгаа этгээдийг хэлнэ гэсэн байгаа. Харин Булган энэ хэрэгт холбогдон шалгагдсан. Тэгэхээр хуулийн хүрээнд гэрчийн хэмжээнд шүүх хуралд оролцох боломжгүй” гэсэн хариултыг өгөв.

Олон нийтэд дэлгэсэн дүрс бичлэгээр Ц.Амгаланбаатар С.Зориг агсныг хэрхэн хөнөөсөн үйл явцаа дүрслэн үзүүлж, хэрэг үйлдсэн ариун цэврийн өрөө өөрчлөгдсөн талаар ярьж байгаа нь ил болов. Мөн хэрэгтнүүдийн төрхийг дүрсэлсэн аман болон фото зургийн эх хувийг үзүүлэв.

В.Бат