Сүхбаатар аймгийн иргэд өчигдрөөс эхлэн суулт зарлаж эхэлжээ. Тус аймгийн иргэдийн сонголтыг эрх баригч нам хөсөрдүүлж, хууль бусаар ажлаа халсан, АН-аас сонгогдсон төлөөлөгчийн бүрэн эрхийг хүлээн зөвшөөрөхгүй байгаа учраас аймгийн Засаг даргын тамгын газрын өмнө гэр барин, суулт зарлаж эхэлсэн байна. 

Тодруулбал, Сүхбаатар аймгийн ИТХ 33 суудалтай. Орон нутгийн сонгуулиар аймгийн ИТХ-д АН 16 МАН 16 суудал авч тэнцжээ. Нэг тойрогт маргаан гарч дахин сонгууль явуулахад АН-ын төлөөлөгч ялсан байна. Ингэснээр АН аймгийн ИТХ-д 17 буюу олонх болсон ч МАН-ынхан хүлээн зөвшөөрөхгүй байгаа нь маргаан үүсгэжээ. Олонх болсон Ардчилсан намын удирдлага 2016 оны долдугаар сарын 19-ний өдрийн МАН-ынхан өөрсдөө хуралдсан ИТХ-ын анхдугаар хуралдааныг хүчингүй болгуулахаар шүүхэд хандаж, заргаа авсан байна. Харин МАН-ын нэхэмжлэлээр Дээд шүүх дээр зарга эхлэсэн байна.

Энэ талаар Сүхбаатар аймгийн АН-ын дэд дарга Д.Хосбаяр “Өнөөдрийн байдлаар дээрх байдлаас үүдэлтэйгээр Сүхбаатар аймаг хууль бус Засаг даргатай, ИТХ нь хуралдаж, төсвөө баталж чадахгүй байна. Хууль бус томилгоонууд хийгдэж байгаа. Нэг үгээр Ерөнхий сайдын үзэглэж батламжилсан хууль бус засаглалын уршгаар Сүхбаатар аймагт засаглалын хямрал нүүрлээд байна” гэсэн юм.

Харин суулт зарлаж байгаа иргэд “Тус аймагт  улс төрийн хямрал нүүрлэж хууль бус томилгоо, халаа сэлгээ газар авч дүрэм журам мөрдөхгүй  байгаа нь МАН 2016 оны УИХ-ын сонгуулийн үр дүнд үнэмлэхүй ялалт байгуулснаараа хуулийг илт зөрчиж,  иргэдийн сонголтыг хүндэтгэхгүй байна” гэв. Тиймээс өнгөрсөн аравдугаар сараас хойш Ардчилсан намаас сонгогдсон төлөөлөгчийг батламжлахгүй, түүний бүрэн эрхийг хүлээн зөвшөөрөхгүй өдийг хүрч байгаад шүүмжлэлтэй хандаж, сонгогдсон гишүүний бүрэн эрхийг хүлээн зөвшөөртөл энэхүү суултаа үргэлжлүүлэх юм байна.

Түүнчлэн Сүхбаатар аймгийн удирдлагуудыг хуулиа биелүүлж, сонгогчдын саналыг хүндэтгэж, дахин сонгуулийн үр дүнг хүлээн зөвшөөрөх, хууль бус халаа сэлгээг таслан зогсоох, АН-ын гишүүнийг батламжлах шаардлагыг аймгийн удирдлагуудад хүргүүлэхээр болжээ.