АН-ын дотоод сонгуулийн санал хураалт өнөөдөр явагдаж байна. Намын 150 мянга гаруй гишүүн өнөөдөр нийслэл, аймаг, дүүргийн АН-ын дарга, Үндэсний бодлогын хорооны 380 гишүүнийг сонгоныг сонгохоор саналаа өгнө.
Нийслэлийн АН-ын даргад ИТХ-ын дарга асан Д.Баттулга, УИХ-ын гишүүн Ш.Түвдэндорж нар өрсөлдөж байгаа бол ҮБХ-ны суудлын төлөө 590 гишүүн өрсөлдөж байгаа билээ. АН-ын энэ удаагийн дотоод сонгууль дагасан шүүмжлэл өрнөсөн. ҮБХ-ны хороонд нэр дэвшигчид 6 сая төгрөгийн дэнчин тавьж байгааг зарим гишүүд эсэргүүцэж, “мөнгөтэй, бэлтэй хүмүүсийн сонгууль болж байна” гэдгийг мэдэгдсэн. Цаашлаад нэр дэвшигчид дотор Олимпийн аварга Н.Түвшинбаяр, сүмогийн их аварга Д.Дагвадорж, Кёкүшюзан Д.Батбаяр, улсын арслан Д.Азжаргал гээд бөхчүүд олноор нэр дэвшсэн нь олны анхаарлыг татаж байгаа.
Нөгөө талаас тоон дотор үсэг цохиж явна гэгчээр БНН-ын дарга Б.Жаргалсайхан АН-ын дотоод сонгуульд нэр дэвшиж олны нүдийг орой дээр нь гаргаад байгаа. Ямартай ч БНН-ын даргыг намаасаа татгалзаж, АН-д гишүүнээр элссэн үйл явдал болоогүй. Гэвч тэрбээр энэ удаад Ерөнхийлөгчийн сонгуульд нэр дэвшихээр санаархаж, парламентад суудалтай намуудыг тандаж, сөрөг хүчний их хуралд хүртэл оролцож, “шадар нөхөрлөх” болсон нь нууц биш.
АН-ын дотоод сонгууль өрнөлөөсөө эхлээ сурталчилгааны хаалт хүртэл дуулиантай байлаа. Учир нь Сонгуулийн сурталчилгаа хаах өдөр буюу өнгөрсөн гуравдугаар сарын 30-нд Ардчилсан намын Дотоод сонгуулийн хорооноос Сэлэнгэ аймагт нэр дэвшсэн С.Баярцогтын нэрийг нэр дэвшигчийн бүртгэлээс хасах шийдвэр гаргав. С.Баярцогтыг Дотоод сонгуулийн хороо Ардчилсан намын үндсэн дүрэм зөрчсөн талаар маргаан ирсэн тул нэр дэвшигчийн бүртгэлээс хаслаа хэмээн тайлбарлажээ.
Өнөөдөр АН-ын нийслэл, аймаг, дүүргийн дарга болон ҮБХ-ны гишүүд тодорно. Тус намын шинэчлэл ийнхүү үргэлжилж байна.
Н.Энх
Уншиж байна |