Ерөнхийлөгч Трамп Солонгосын хойг руу байлдааны хөлөг онгоцоо илгээжээ. Энэ талаар “www.dailymail.co.uk” сайт мэдээллээ.

АНУ-ын Төрийн нарийн бичгийн дарга Рекс Тиллерсон өнгөрсөн долоо хоногт “Хойд Солонгосын талаарх бидний ярих зүйл дууссан” хэмээн мэдэгдсэн билээ. Уг мэдэгдлийн дараахан Цагаан ордны тэргүүн Дональд Трамп Солонгосын хойг руу цэргийн хүчээ илгээсэн явдал олны анхаарлыг татаж байна.

“Вашингтон сүүлийн үеийн зэр зэвсгийн тусламжтай Хойд Солонгосыг нухчин дарах зорилготой байна” хэмээн “CNN” агентлаг мэдээлэв. Хойд Солонгос тийм ч амархан бууж  өгөхгүй бөгөөд хариу арга хэмжээ авах нь нэгэнт тодорхой.

“Тэд пуужин харвах цаашлаад цөмийн туршилт хийх аюултай. Хэрвээ тус улс цөмийн туршилт хийвэл АНУ бус Хойд Солонгостой хөрш зэргэлдээ орнууд л ихээхэн хохирол амсахыг конгрессийн гишүүд эрхэм Ерөнхийлөгчдөө анхааруулж байна. Трамп хойг руу 100 000 тонн жинтэй “USS Carl Vinson” нисэх онгоц тээвэрлэгчийг дагалдах хөлгүүдийн хамт Номхон далайн баруун хэсэгт шилжин байрших тушаал буулгажээ. Уг хөлөг онгоцууд Сингапураас Австралид очих байсан ч дээрээс ирсэн зааврын дагуу байршлаа өөрчилсөн аж.

Тэд хэдхэн өдрийн дараа Солонгосын хойгт хүрэх юм. Хойд Солонгосыг үүсгэн байгуулагч Ким Ир Сений мэндэлсний 105 жилийн ой энэ сарын 15-ны өдөр тохиох билээ. Энэ өдөр тус улсын залуу удирдагч Ким Чен Ун улсынхаа сүр хүчийг гайхуулсан пуужингийн туршилт хийх магадлалтай байгаа талаар Өмнөд Солонгосын эрх баригчид сануулж байна.

Ким Чен Ун энэ өдөр өвөөгөө дурсан санахаас гадна жинхэнэ өстөн дайсан болох АНУ-д цохилт өгөх магадлалтай. Пхеньяны харвасан пуужин АНУ-д хараахан хүрч чадахгүй ч гэлээ тэд Солонгосын хойг руу очиж буй хөлгүүдэд цохилт өгөх эрсдэлтэй байна. “Хэрвээ Ким Чен Ун хөлгүүдийг устгах тушаал буулгаж, харилцан гал нээвэл олон сая хүнийг эрсдэлд оруулна” хэмээн конгресс дахь Ардчилсан намын гишүүд мэдээллээ. АНУ-ын хөлөг онгоц хойгийг чиглэн ирж буйтай холбогдуулан Хойд Солонгосын төрийн мэдлийн “KCNA” агентлаг “Зэвсгийг зэвсгийн хүчээр” гэж мэдэгджээ.

Ганцхан бууны сум эсвэл пуужин эцэс төгсгөлгүй дайны эхлэл болж магадгүй. “Ерөнхийлөгч Трамп 48 цагийн дотор Сири болон Өмнөд Солонгост байгаа АНУ-ын цэргийн бие бүрэлдэхүүнийг эрсдэлд орууллаа” гишүүд уламжлав. Учир нь өнгөрсөн пүрэв гаригт АНУ-ын цэргүүд Сирийн Хомс хотноо байрлах тус улсын агаарын нисэх баазыг пуужингаар харвасан юм.

Трамп уг үйдлээ “Сирийн Ерөнхийлөгч Башар аль Ассад иргэдийнхээ эсрэг химийн зэвсэг ашигласаны хариу” гэв. Трампийн бодлогогүй үйлдлийн дараа ОХУ-ын Батлан хамгаалах яам “Сирийн армийнхан химийн зэвсэг ашигласан гэх баримт нотолгоог олоогүй байж, хэн нэгний худал үгэнд итгэж, үйл ажиллагаагаа хэвийн явуулж, террористуудын эсрэг тэмцэж байсан цэргийн баазыг устгалаа” гэж мэдэгджээ. Трамп энэ ондоо багтаан Сири болон Хойд Солонгосын асуудлыг шийдвэрлэхээр улайрч байгаа. “Трампийн алсын хараагүй бодлого дайныг улам өдөөн турхирч магадгүй” байгааг хэвлэлийнхэн мэдээлэв.

Сири болон Хойд Солонгост зэвсэг нийлүүлж буй хувь хүн, улсын дансыг царцааж, хар дансандаа оруулахаа Вашингтон сануулсан билээ. Хойд Солонгос руу шууд цэргээ илгээх нь эрсдэл өндөртэй. Харин хэлэлцээрийн ширээний ард сууж, тэдний болзолыг сонсвол илүү хялбараар хоёр Солонгосын дунд үүсээд буй харилцааг тогтворжуулах боломжтой юм. “Хэлэлцээрийн ширээний ачаар хоёр улс өнөөг хүртэл дайтаагүй” гэдгийг албаныхан Трампт сануулж байна. Хойд Солонгосын эрх баригчид өнгөрсөн сард “АНУ-тай дайн хийхэд бэлэн” гэдгээ олон улсад тунхаглаж, “Манай цөмийн хүч бол шударга ёсыг сахиулах илд. Бид энэхүү илдээрээ социалист эх орон, ард түмнээ харийн дайснаас хамгаалах арга юм. Бидний урдаас зэвсэг барин тэмцсэн бүхэнтэй тулалдах болно” гэж мэдэгджээ.

АНУ-ын үе үеийн удирдлагууд Пхеньянтай сөргөлдөхөөс сэргийлэн хэзээ ч Солонгосын хойгт цэргийн сургуулилтаас өөр дайныг өдөөн турхирсан үйлдэл хийж байгаагүй юм. Трамп хойг руу байлдааны хөлгөө илгээсэн явдал Азийн ихэнх орныг айдаст автууллаа.

Энэ талаар Төрийн нарийн бичгийн дарга Тиллерсон “Энэхүү цэргийн ажиллагааг явуулахад БНХАУ-ын удирдлагатай зөвшилцсөн. Нөхцөл байдал өдрөөс өдөрт хүндэрч байна. Энэ бүхнийг Си дарга ойлгож байгаа” гэж мэдэгджээ. БНХАУ-ын дарга Си Зиньпин өнгөрсөн долоо хоногт АНУ-д айлчилсан юм. Уг айлчлалын хүрээнд Си, Трамп нар Хойд Солонгосын асуудлаар хэлэлцсэн билээ.

Удирдагчдын дээд хэмжээний уулзалтын үеэр АНУ, Сирийг бөмбөгдөж байсан. Сирийн баазыг устгасан явдлыг Хойд Солонгос эрс буруутгаж,“Тэвчихийн аргагүй хүчирхийлэл” хэмээн мэдэгджээ.

Б.Дэлгэрцэцэг